Çmimet e naftës janë rritur ndjeshëm në tregjet ndërkombëtare, duke kaluar nivelin e 116 dollarëve për fuçi pas përshkallëzimit të tensioneve në Lindjen e Mesme.
Në hapjen e tregjeve të dielën, nafta Brent, treguesi global, u rrit me 3.3% duke arritur në 116.25 dollarë për fuçi, ndërsa WTI, referenca kryesore amerikane, u rrit me rreth 3% në afro 103 dollarë për fuçi.
Rritja vjen pas sulmeve me raketa dhe dronë të militantëve Huthi të mbështetur nga Irani drejt Izraelit gjatë fundjavës, të cilët kanë paralajmëruar vazhdimin e sulmeve. Paralelisht, çmimet e benzinës në SHBA iu afruan nivelit prej 4 dollarësh për galon, duke u rritur nga 3.976 në 3.98 dollarë.
Tensionet janë shtuar më tej edhe nga zhvillimet ushtarake në terren. Më shumë se 3,500 trupa amerikane, përfshirë rreth 2,500 marinsa, kanë mbërritur në Lindjen e Mesme, duke rritur ndjeshëm pasigurinë në rajon dhe presionin mbi tregjet globale të energjisë.
Situata është përkeqësuar edhe nga bllokimi i Ngushticës së Hormuzit nga Irani, një korridor strategjik nga ku kalon rreth një e pesta e tregtisë botërore të naftës detare, duke shtuar frikën për ndërprerje të furnizimit dhe rritje të mëtejshme të çmimeve.
Në këtë situatë, mbetet për t’u parë nëse kjo rritje e fortë në tregjet ndërkombëtare do të reflektohet edhe në tregun shqiptar, ku historikisht luhatjet globale të naftës janë përcjellë në kohë rekord me ndikim të drejtpërdrejtë te çmimet për konsumatorët. /skyweb.al
