Në një vit kur në ekonominë shqiptare qarkulluan rreth 504 miliardë lekë, falsifikimi i parasë rezulton në nivele minimale. Raporti i Bankës së Shqipërisë për vitin 2025 tregon se u sekuestruan vetëm 107 kartëmonedha të falsifikuara dhe 119 monedha metalike false, ndërsa niveli i falsifikimit të kartëmonedhave ra në një minimum historik prej 0.64 copë për 1 milion në qarkullim.
Sipas të dhënave, falsifikimi i kartëmonedhave ka ardhur në rënie të vazhdueshme nga viti në vit. Në qarkullim ishin rreth 178 milionë kartëmonedha me vlerë afro 496 miliardë lekë, ku pjesën më të madhe të prerjeve të falsifikuara e zënë kartëmonedhat 5,000 lekë, të ndjekura nga ato 2,000 dhe 1,000 lekë.
Sa i përket monedhave metalike, në një treg me rreth 311 milionë copë në qarkullim, falsifikimi rezulton thuajse periferik. Sipas raportit, vetëm monedha 50 lekë është evidentuar si e falsifikuar.
Banka e Shqipërisë thekson se rastet e identifikuara gjatë vitit 2025 janë riprodhime të thjeshta, të realizuara me pajisje digjitale komerciale dhe ndërhyrje artizanale për të imituar elementet e dukshme të sigurisë. Elementet e avancuara, të lexueshme nga pajisjet autentifikuese, nuk janë imituar në asnjë rast, duke konfirmuar efektivitetin e teknologjive mbrojtëse.
Gjatë vitit, u përpunuan rreth 91.1 milionë kartëmonedha për kontroll autenticiteti dhe përshtatshmërie për riqarkullim. Norma e papërshtatshmërisë ishte 21.3%, ndërsa kartëmonedhat e dëmtuara u zëvendësuan në mënyrë sistematike.
Krahasuar me vitin 2024, numri i kartëmonedhave në qarkullim u rrit me rreth 17 milionë copë, ndërsa monedhat metalike me 20 milionë copë. Rritja e tyre tregon një zhvendosje të strukturës drejt prerjeve më të mëdha, kryesisht 5,000 dhe 10,000 lekë.
