Ministria e Infrastrukturës dhe Energjisë deklaron se zgjidhja e kontratës koncesionare për Aeroportin Ndërkombëtar të Vlorës ka hyrë në fuqi, pasi Arbitri i Emergjencës nuk pranoi kërkesën e shoqërisë VIA për pezullimin e saj.
Sipas reagimit zyrtar, urdhri është nxjerrë më 16 shtator 2026, në kuadër të procedurës së arbitrazhit të urgjencës të nisur nga VIA, shoqëria koncesionare e aeroportit.
Ministria e konsideron vendimin një fitore të rëndësishme, duke theksuar se arbitri rrëzoi plotësisht dy nga tri kërkesat e koncesionarit.
Kërkesa kryesore e VIA-s ishte pezullimi i zgjidhjes së kontratës dhe i zbatimit të njoftimit të Ministrisë. Por, sipas MIE-së, arbitri vlerësoi se kontrata dhe provat e paraqitura nuk krijonin bazë të mjaftueshme ligjore për një masë të tillë.
Për këtë arsye, Ministria pretendon se zgjidhja e kontratës koncesionare ka hyrë tashmë në fuqi.
Arbitri ka rrëzuar gjithashtu kërkesën e VIA-s për ta detyruar Ministrinë të merrte pjesë në një proces ndërmjetësimi dhe të caktonte një ndërmjetës. Nuk është pranuar as kërkesa për shtyrjen me dy muaj të fillimit të arbitrazhit.
Megjithatë, arbitri ka urdhëruar ruajtjen e përkohshme të status quo-së. Deri në krijimin e tribunalit të plotë të arbitrazhit, Ministria nuk mund të ushtrojë disa prej të drejtave që lindin pas zgjidhjes së kontratës.
Praktikisht, kontrata konsiderohet e zgjidhur, por qeveria nuk mund të marrë menjëherë kontrollin operacional të aeroportit, të kërkojë dorëzimin e aseteve apo ta kalojë projektin te një operator tjetër, deri në një vendimmarrje të mëtejshme.
MIE thekson se kjo masë është afatshkurtër dhe nuk cenon vlefshmërinë e zgjidhjes së kontratës. Ajo do të qëndrojë në fuqi vetëm deri në konstituimin e tribunalit që do ta shqyrtojë konfliktin.
Sipas Ministrisë, VIA është urdhëruar gjithashtu të përballojë shpenzimet e procedurës së arbitrazhit të urgjencës.
MIE njoftoi se do t’i komunikojë zyrtarisht VIA-s hyrjen në fuqi të zgjidhjes së kontratës dhe do të përgatisë hapat e mëtejshëm për aeroportin, duke respektuar kufizimet e përkohshme të vendosura nga arbitri.
Konflikti nuk konsiderohet i mbyllur. Tribunali i plotë i arbitrazhit do të duhet të vendosë nëse zgjidhja e kontratës ishte e ligjshme, kush mban përgjegjësi për vonesat dhe nëse palët kanë të drejtë të kërkojnë dëmshpërblim.
