Terapitë mendje-trup mund t’i ndihmojnë njerëzit që jetojnë me pasojat e zgjatura të trajtimit të kancerit të menaxhojnë lodhjen, dhimbjen dhe problemet me gjumin, sipas një analize të re.
Ushtrimet e frymëmarrjes, meditimi, si dhe praktikat e tai-çit dhe qigongut reduktuan lodhjen dhe dhimbjen te njerëzit me kancer, të cilët kishin përfunduar trajtimin e tyre kryesor, por vazhdonin të përjetonin të paktën një nivel mesatar të shqetësimit psikologjik, zbuloi studimi i ri.
Tai-çi dhe qigongu, një praktikë e lashtë kineze mendje-trup që kombinon lëvizje të buta dhe të rrjedhshme me përqendrim të shtuar te ndjesitë e trupit dhe frymëmarrja përmirësuan gjithashtu cilësinë e gjumit, diçka me të cilën përballen shumica e pacientëve me kancer.
Terapia mendje-trup “ka qenë një ndihmë e jashtëzakonshme për të përballuar këtë rrugëtim kaq të pakëndshëm”, tha i mbijetuari i kancerit Ken Taub, i cili mori pjesë në studim. Ai shtoi se tani “mund ta nis ditën duke u ndier i freskët dhe i çlirët”.
Numri i të mbijetuarve nga kanceri po rritet gjithnjë e më shumë. “Gjithnjë e më shumë njerëz me kancer po jetojnë më gjatë, por shpesh përballen me efekte anësore afatgjata që mund të jenë të vështira për t’u menaxhuar”, tha Linda E. Carlson, profesore në Universitetin e Calgary-t dhe drejtuese e studimit, në një deklaratë për shtyp.
