Kryeministri spanjoll tha se do të kriminalizojë atë që ai e quajti “manipulim algoritmik”, i cili i jep krahë viralitetit të përmbajtjeve që nxisin gjuhë urrejtjeje dhe polarizim në shoqëri. Po ashtu, deklaroi se platformat do të mbajnë përgjegjësi për çfarë publikohet aty, gjë që nuk ka ndodhur deri më tani, pasi përmbajtja e shpërndarë është përgjegjësi e përdoruesve dhe jo e rrjetit social.
Deri më tani, debati mbi algoritmet dhe mënyrën se si ato e shpërndajnë informacionin është mbajtur në nivel ekspertësh dhe, në dijeninë time, ky është rasti i parë, të paktën në Europë, që ngrihet në nivel politikash.
Mbetet për t’u parë nëse do të ketë liderë të tjerë europianë apo gjetkë që do të propozojnë nisma të tilla.
Kjo është shumë e madhe, edhe pse shumëkujt, me të drejtë deri diku, mund t’i duket muhabet kot.
Mirëpo, ndërhyrja në logjikën se si veprojnë algoritmet shkon drejtpërdrejt kundër modelit të biznesit të platformave, të cilat kanë synim rritjen e angazhimit dhe zgjatjen e kohës së qëndrimit në to. Zakonisht, janë përmbajtjet polarizuese që e bëjnë këtë.
Reagimi i parë nga platformat erdhi dhe duket se ky është momenti i zgjerimit të këtij debati shumë të rëndësishëm, por edhe interesant.
Pronari i “X”, Elon Musk, e quajti Kryeministrin Sanchez “diktator fashist” pas këtij fjalimi. Me gjasë do të reagojnë edhe të tjerët.
Në fakt, debati për algoritmet nuk është një debat që zhvillohet atje tej, larg nesh.
Është ndoshta një ndër çështjet që duhet të na interesojë më shumë sesa ndonjë show i përnatshëm, qoftë edhe vetëm si spektatorë.
Bëhet fjalë për mënyrën se si po na “plugojnë” mendjen dhe shoqërinë.
A është ndërhyrja nga lart gjëja e duhur që duhet bërë sipas meje? Mendoj se jo.
Unë i besoj vetërregullimit, por puna është që deri më tani platformat nuk është se i morën parasysh shqetësimet e ekspertëve mbi ndikimet negative në shoqëri të logjikës se si algoritmet e shërbejnë informacionin në rrjetet sociale.
Dhe kur nuk dëgjon më të mirën, del ndonjëri me shkop në dorë.
Spanish PM Pedro Sánchez:
The owner of X, himself a migrant, used his personal account to amplify disinformation about the sovereign decision of my government to regularize 500,000 migrants who live, work, and contribute to the success of our country. pic.twitter.com/WHjDLwCrdb
— Clash Report (@clashreport) February 3, 2026
