Pavarësisht skandaleve, padive për sigurinë e fëmijëve dhe shqetësimeve për privatësinë, Meta vazhdon të rrisë të ardhurat dhe numrin e përdoruesve, ndërsa synon të zgjerohet në fushën e inteligjencës artificiale, shkruan BBC.
Kompania Meta, pronare e Facebook, Instagram dhe WhatsApp, po përballet me një valë padish dhe kritikash për ndikimin e rrjeteve sociale te të rinjtë. Megjithatë, këto polemika nuk duket se kanë ndikuar ndjeshëm në performancën e saj financiare.
Gjatë muajve të fundit, kompania është përballur me procese gjyqësore në SHBA, ku është akuzuar se platformat e saj janë projektuar në mënyrë që të nxisin përdorimin e tepruar dhe të dëmtojnë shëndetin mendor të të miturve. Në një prej çështjeve, një juri në New Mexico e gjobiti kompaninë me 942 milionë dollarë, ndërsa Meta ka kundërshtuar vendimet dhe ka paralajmëruar apelime.
Kritikat janë shtuar edhe për mënyrën se si kompania trajton të dhënat personale, një çështje që e shoqëron që prej skandalit Cambridge Analytica. Sipas një sondazhi të Reuters/Ipsos, 85% e amerikanëve mendojnë se rrjetet sociale mund të krijojnë varësi te fëmijët, ndërsa 61% mbështesin mbikëqyrje më të madhe nga qeveria.
Megjithatë, shifrat tregojnë një tablo tjetër. Përdorimi i disa prej aplikacioneve të Metës është rritur me 3% në bazë vjetore, ndërsa të ardhurat e tremujorit të dytë janë rritur me 28% krahasuar me të njëjtën periudhë të vitit 2025.
Në të njëjtën kohë, kompania po orienton gjithnjë e më shumë vëmendjen drejt inteligjencës artificiale. Në aktivitetin e saj Meta Connect, Mark Zuckerberg prezantoi produkte të reja, përfshirë syze inteligjente dhe pajisje të veshshme, si dhe asistentin e ri të inteligjencës artificiale, Muse.
Ky asistent mund të kryejë detyra në disa hapa, si porositja e produkteve apo menaxhimi i informacionit financiar. Por funksionimi i tij kërkon qasje në të dhëna personale, email-e dhe histori blerjesh, duke ngritur sërish pikëpyetje mbi privatësinë dhe besimin e përdoruesve.
Përballë kritikave dhe proceseve gjyqësore, Meta duket se po arrin të ruajë rritjen ekonomike dhe interesin e publikut. Sfida e saj kryesore mbetet nëse do të mund ta shndërrojë suksesin në inteligjencën artificiale në një avantazh afatgjatë, pa përkeqësuar problemet e besimit që e shoqërojnë prej vitesh. /skyweb.al
