Fotot e reja mahnitëse të realizuara nga astronautët e Artemis II tregojnë Hënën dhe brendësinë e anijes Orion, duke ofruar një pamje të jetës së tyre në hapësirë teksa afrohen drejt një momenti tjetër historik, shkruan CNN.
Një nga imazhet që nxjerr në pah Hënën ka kapur edhe një pjesë të basenit Orientale, diçka që sipas NASA-s shihet për herë të parë nga sytë e njeriut. Deri më tani, këtë rajon hënor e kishin parë vetëm pajisjet robotike. Krateri i mbuluar nga hija, me gjerësi rreth 965 kilometra, përfaqëson një zonë kalimtare mes anës së dukshme dhe asaj të padukshme të Hënës.
Fotot e realizuara nga brenda kapsulës Orion janë zhvendosur nga fokusimi vetëm te pamjet e ndritshme të Tokës drejt përqendrimit te Hëna, ndërsa misioni i afrohet gjithnjë e më shumë saj. Sipas NASA-s, ekuipazhi ka kaluar më shumë se gjysmën e rrugës drejt Hënës dhe fluturimi pranë saj pritet të ndodhë të hënën.
Astronautët kanë thënë se Hëna duket gjithnjë e më e madhe përmes dritareve të Orionit ndërsa udhëtimi vazhdon.
Edhe imazhet e Tokës nga Artemis II kanë qenë mbresëlënëse, duke treguar këndvështrime që nuk janë parë nga njerëzit që prej kohës së misioneve Apollo.
Ekuipazhi është shfaqur gjithashtu drejtpërdrejt në kamera gjatë transmetimeve të vazhdueshme të NASA-s, duke ofruar momente spontane nga jeta e tyre në hapësirë.
Në një foto të re të ndriçuar butë, shumica e dritave të anijes Orion janë fikur për të shmangur reflektimin në dritare, duke i lejuar astronautit kanadez Jeremy Hansen të shijojë pamjen jashtë.
Ashtu si në misionin Artemis I në vitin 2022, udhëtimi i Artemis II përfshin edhe mundësi për “selfie”. Panelet diellore të Orionit janë të pajisura me kamera që mund të realizojnë foto me rezolucion të lartë, përfshirë edhe ato me Hënën ose Tokën në sfond.
Kjo fotografi është realizuar gjatë një inspektimi rutinë të jashtëm të Orionit në ditën e dytë të misionit, duke ofruar një këndvështrim unik të kapsulës në mjedisin hapësinor. /skyweb.al
