20 kompanitë ajrore më të sigurta në Europë, shumë prej tyre fluturojnë edhe nga Shqipëria

Aegean Airlines, Ryanair dhe Austrian Airlines kryesojnë Indeksin Europian të Sigurisë Ajrore për vitin 2026, të publikuar nga AirAdvisor.

Renditja përfshin 20 kompani të mëdha që operojnë në Europë dhe mbështetet në të dhënat e periudhës 2016–2025.

Kompania greke Aegean zuri vendin e parë me 89 pikë nga 100 të mundshme, e ndjekur nga Ryanair me 86 dhe Austrian Airlines me 85.5 pikë. Norwegian dhe SunExpress plotësojnë pesëshen e parë. Aegean mori pikët maksimale për historikun e sigurisë, pa aksidente që plotësonin kriteret e studimit gjatë dekadës së analizuar.

Një nga gjetjet kryesore është pozicionimi i lartë i kompanive me kosto të ulët: tre prej tyre janë mes pesë të parave.

Mesatarisht, këta operatorë morën 79.2 pikë, kundrejt 82.8 pikëve të kompanive tradicionale.

Sipas drejtuesit të AirAdvisor, Anton Radchenko, rezultatet nuk mbështesin perceptimin se një biletë më e lirë nënkupton më shumë rrezik. Historiku i aksidenteve dhe sistemet e menaxhimit të sigurisë rezultuan të ngjashme mes dy kategorive.

Wizz Air renditet në vendin e 15-të me 79.5 pikë, ndërsa Pegasus mbyll listën me 64.5 pikë.

Megjithatë, të dyja morën vlerësimin maksimal për moshën dhe profilin teknik të flotës.

Raporti thekson se avionët më të rinj nuk përcaktojnë të vetëm sigurinë: Edhe një avion më i vjetër, i mirëmbajtur, mund të operojë në mënyrë të sigurt për dekada.

Vlerësimi kombinon gjashtë kritere: historikun e sigurisë me peshë 40%, certifikimet dhe auditimet 20%, sistemet e sigurisë operacionale 15%, flotën 10%, trajnimin e pilotëve 10% dhe stabilitetin financiar 5%.

AirAdvisor sqaron se indeksi shërben për krahasim dhe nuk duhet interpretuar si përcaktim nëse një kompani është e sigurt apo e pasigurt.

Renditja e plotë e 20 kompanive