Vetëm pak ditë pas rikonstruksionit dhe rihapjes për qarkullim, Ura e Milotit është dëmtuar nga një tentativë grabitjeje gjatë orëve të natës, duke ngritur pikëpyetje serioze mbi sigurinë e infrastrukturës publike.
Autoriteti Rrugor Shqiptar bën me dije se është njoftuar në mëngjes nga kompania kontraktore e mirëmbajtjes për një ndërhyrje të qëllimshme në strukturën e urës. Menjëherë pas sinjalizimit, në terren janë dërguar inxhinierët për verifikimin e situatës.
Sipas konstatimeve, persona ende të paidentifikuar kanë tentuar të vjedhin fugat metalike anësore të urës, duke shkaktuar dëmtime që përbëjnë rrezik të drejtpërdrejtë për sigurinë rrugore.
ARRSH thekson se rasti është referuar pranë Drejtorisë Vendore të Policisë Lezhë, pasi bëhet fjalë për dëmtim të pronës publike dhe një veprim që mund të kishte pasoja të rënda për mjetet që kalojnë në këtë aks të rëndësishëm.
Ndërkohë, strukturat e mirëmbajtjes kanë ndërhyrë menjëherë për riparimin e dëmtimit, duke rikthyer funksionalitetin e plotë të urës.
Aktualisht, qarkullimi në Urën e Milotit vijon normalisht, ndërsa mbetet për t’u parë nëse autorët e kësaj tentative do të identifikohen dhe mbajnë përgjegjësi për një akt që vë në rrezik sigurinë publike. /skyweb.al
