Muaji mars ka shënuar një kthesë të dukshme për sektorin e turizmit dhe lëvizjen e shtetasve në Shqipëri, duke rikthyer rritjen pas një periudhe të vakët në fillim të vitit. Sipas të dhënave, gjatë marsit kanë hyrë në territorin shqiptar rreth 1.28 milion shtetas shqiptarë dhe të huaj, një rritje prej 11.7% krahasuar me të njëjtin muaj të vitit 2025.
Rritja është mbështetur si nga lëvizjet e shtetasve shqiptarë, ashtu edhe nga vizitorët e huaj. Konkretisht, rreth 680 mijë shqiptarë kanë hyrë në vend gjatë marsit, me një rritje prej 12.5% në raport me një vit më parë. Ndërkohë, numri i të huajve ka arritur në rreth 609 mijë, duke shënuar një rritje prej 10.8%. Ky trend lidhet edhe me faktorë të jashtëm, përfshirë zhvillimet gjeopolitike në rajone të tjera, që kanë orientuar turistët drejt destinacioneve alternative, ku Shqipëria po perceptohet gjithnjë e më shumë si një vend i sigurt dhe në zhvillim për pushime.
Sa i përket origjinës së turistëve, dominimi mbetet i qartë nga Europa Jugore, e cila përbën rreth 80% të hyrjeve nga kontinenti europian. Europa Perëndimore kontribuon me një peshë dukshëm më të ulët, rreth 7%, duke treguar ende hapësirë për zgjerim në këto tregje.
Turizmi vijon të jetë motivi kryesor i hyrjeve në vend. Në 97% të rasteve, shtetasit e huaj kanë hyrë për arsye personale, si pushime apo vizita familjare, një tregues që është rritur me 11.2% krahasuar me marsin e vitit të kaluar. Në të kundërt, hyrjet për qëllime biznesi dhe profesionale kanë mbetur pothuajse në vendnumëro, me një rritje minimale prej 0.2%.
Në nivel tremujori, Shqipëria ka regjistruar rreth 3.5 milion hyrje gjatë tre muajve të parë të vitit 2026. Prej tyre, rreth 1.67 milion janë shtetas të huaj, me një rritje modeste prej 3.2%. Paralelisht, është rritur edhe numri i daljeve nga vendi. Vetëm në mars, rreth 1.28 milion shtetas kanë dalë nga Shqipëria, një rritje prej 8.5% krahasuar me të njëjtën periudhë të një viti më parë.
Këto shifra tregojnë një intensifikim të qarkullimit dhe një rigjallërim të përgjithshëm të flukseve hyrëse dhe dalëse, duke sinjalizuar një sezon turistik që po merr ritëm më të qëndrueshëm pas nisjes së vakët të vitit.
