Evropa mund të përballet me anulime të shumta fluturimesh gjatë verës për shkak të mungesës së karburantit të avionëve, një zhvillim që rrezikon të godasë drejtpërdrejt sezonin turistik dhe industrinë e aviacionit.
Paralajmërimi vjen nga Shoqata Ndërkombëtare e Transportit Ajror (IATA), e cila thekson se situata mund të përkeqësohet që nga fundi i muajit maj.
Sipas Drejtorit të Përgjithshëm të IATA-s, Willie Walsh, linjat ajrore po përpiqen të sigurojnë furnizime alternative, ndërsa presioni mbi tregun e karburantit po rritet.
Në këtë kontekst, autoritetet janë nxitur të përgatisin plane të koordinuara emergjente për të përballuar krizën e mundshme.
Mes masave që po diskutohen përfshihen kufizimi i furnizimit me karburant dhe lehtësimi i slot-eve në aeroporte, në mënyrë që të menaxhohet fluksi i fluturimeve.
Situata ngre shqetësime serioze për funksionimin normal të trafikut ajror në Evropë, sidomos në një periudhë kur kërkesa për udhëtime pritet të rritet ndjeshëm.
Nëse mungesa e karburantit thellohet, pasojat mund të shtrihen përtej anulimeve, duke prekur zinxhirin e furnizimit dhe ekonominë e sektorit të transportit ajror. /skyweb.al
