Prokuroria e Posaçme ka vendosur sekuestrimin e një shume të konsiderueshme fondesh në kuadër të hetimeve që po zhvillohen ndaj Andis Papës, si pjesë e dosjes së gjerë të AKSHI-t. Sipas njoftimit zyrtar, në emër të tij janë vendosur në sekuestro:
– 410,595,663 lekë në subjektin “Fastech” sh.p.k.;
– 94,423,883 lekë në subjektin “Fast and Fresh”.
Në total, bëhet fjalë për mbi 505 milionë lekë, të cilat po verifikohen për burimin dhe mënyrën e përfitimit, ndërsa hetimi është shtrirë tashmë edhe te flukset financiare dhe aktiviteti i kompanive të lidhura me personat nën hetim.
DOSJA/ Andis Papa dhe Ermal Beqiri “blenë” 10 mln euro çokollata e biskota me paratë e AKSHI-t
Kush është Andis Papa dhe si lidhet me dosjen AKSHI
Andis Papa është një nga biznesmenët që rezulton në hetim në kuadër të dosjes së AKSHI-t, përmes kompanisë së tij “Fastech”. Sipas materialeve të hetimit, ai dyshohet të ketë qenë pjesë e mekanizmit që shoqëronte procedurat e tenderimit, përfshirë pjesëmarrjen në gara, marrëdhënie kontraktore dhe qarkullim fondesh që po verifikohen për natyrën e tyre reale.
Hetimet kanë ngritur dyshime se një pjesë e këtyre marrëdhënieve mund të jenë përdorur për të krijuar një skemë më të gjerë financiare, ku kompanitë private shërbenin për qarkullimin e pagesave të lidhura me kontrata dhe shërbime të dyshuara.
“Historia e çokollatave”, 10 milionë euro në fokus të hetimit
Një nga episodet më të forta të kësaj dosjeje është ai i njohur si “historia e çokollatave”. Sipas hetimeve të SPAK, gjatë viteve 2018, 2020 dhe 2021, rreth 10 milionë euro janë transferuar përmes faturave drejt kompanisë “Mega Distribution”, një biznes që merret me import–eksport të produkteve ushqimore dhe veshjeve.
Pronari i kësaj kompanie, Rogers Rryta, ka deklaruar para BKH se aktiviteti i tij lidhet vetëm me tregtinë e çokollatave, biskotave dhe produkteve të tjera ushqimore, duke theksuar se nuk ka asnjë lidhje me teknologjinë apo shërbimet IT.
Megjithatë, ai ka pranuar se ka pasur marrëdhënie tregtare me kompanitë “Fastech” dhe “Soft & Solution”, ndërsa ka deklaruar se nuk njeh personalisht Andis Papën, Ermal Beqirin, Ergys Agasin apo Mirlinda Karçanajn.
Nga ana tjetër, sipas hetimit, Andis Papa fillimisht ka deklaruar se pagesat prej rreth 10 milionë eurosh lidhen me shërbime teknologjike, por më pas, pasi është përballur me faktin se “Mega Distribution” nuk operon në këtë fushë, ka ndryshuar version.
“Sic ju thashë nuk e di mirë çfarë kemi blerë. Kemi bërë dhe kontrata me këtë shoqëri. Mbaj mend që ata sillnin produkte nga Turqia”, ka deklaruar ai para hetuesve.
Ky episod ka ngritur dyshime të forta mbi natyrën reale të transaksioneve dhe përdorimin e faturave për aktivitete që nuk përputhen me objektin e kompanive, duke u konsideruar nga hetuesit si pjesë e një skeme të mundshme për transferimin dhe fshehjen e parave.
Ndaj Andis Papës dhe Rogers Rrytës është vendosur masa e sigurisë “bllokim pasaporte”, ndërsa hetimet vijojnë për të zbardhur plotësisht rolin e tyre dhe lidhjet financiare në këtë dosje. /skyweb.al
