Duke filluar nga 1 maji 2026, hyjnë në fuqi rregulla të reja të Bashkimit Europian për produktet kozmetike, me synim rritjen e sigurisë për konsumatorët dhe forcimin e kontrollit mbi përbërësit që mund të jenë të dëmshëm.
Rregullorja, e miratuar më 12 janar 2026, parashikon kufizime më të ashpra për substancat e klasifikuara si CMR (kancerogjene, mutagjene ose toksike për riprodhimin). Këto ndryshime prekin drejtpërdrejt produkte të përdorura gjerësisht si manikyrët, parfumet, kozmetika dekorative dhe produktet e higjienës orale.
Një nga pikat kryesore lidhet me përdorimin e argjendit (CI 77820), i cili përdoret për të krijuar efekte metalike dhe shkëlqyese. Sipas rregullave të reja, ai do të lejohet vetëm në një përqindje deri në 0.2% dhe vetëm në produkte të caktuara si buzëkuqet, gloss-et dhe rimelët.
Nga ana tjetër, përdorimi i tij do të ndalohet në manikyrë, xhel për thonj, produkte për ndërtimin e tyre, si dhe në sprej dhe produkte aerosol. Si pasojë, shumë produkte aktuale me efekt glitter ose metalik me bazë argjendi nuk do të jenë më në përputhje me standardet dhe nuk do të lejohen as për përdorim profesional në qendrat estetike.
Industria kozmetike në Europë pritet të kalojë një fazë përshtatjeje, pasi prodhuesit dhe profesionistët do të duhet të reformulojnë produktet dhe të përditësojnë praktikat për t’iu përmbajtur kërkesave të reja ligjore.
Këto masa janë pjesë e një nisme më të gjerë të BE-së për të garantuar mbrojtje më të lartë të shëndetit publik dhe për të ulur ekspozimin ndaj substancave potencialisht të rrezikshme në përdorimin e përditshëm.
