Ministri i Financave, Petrit Malaj, deklaroi në një dalje për mediat se duke nisur nga 1 korriku 2026 do të fillojë zbatimi i kompensimit të TVSH-së për fermerët.
Sipas tij, bazuar në vlerësimet paraprake të bëra mbi transaksionet e autofaturave të lëshuara nga grumbulluesit dhe përpunuesit, për tremujorin e parë të vitit 2026 pritet që shuma totale e kompensimit të arrijë rreth 400 milionë lekë.
Ministri theksoi se administrata tatimore është duke analizuar efektet e kësaj politike të re. Gjatë tremujorit të parë të vitit 2026 është konstatuar një rritje me 20% e transaksioneve mes fermerëve të pajisur me NIPT dhe subjekteve blerëse si grumbulluesit dhe përpunuesit.
Aktualisht, numri i fermerëve që kryejnë transaksione me blerës të regjistruar në TVSH është 5,642, ndërsa numri i blerësve të tillë ka arritur në 448, një rritje prej 16% krahasuar me të njëjtën periudhë të vitit 2025. Në total, në vend janë 113,470 fermerë të pajisur me NIPT.
Malaj bëri thirrje ndaj grumbulluesve dhe përpunuesve që të lëshojnë autofatura për fermerët, pasi kjo është baza mbi të cilën përllogaritet kompensimi.
Skema e re e kompensimit të TVSH-së ka hyrë në fuqi më 1 janar 2026 dhe parashikon që fermerët të përfitojnë një rimbursim prej 10% për produktet bujqësore që shesin tek grumbulluesit, përpunuesit apo agroturizmet e certifikuara.
Sipas ndryshimeve ligjore, kompensimi llogaritet mbi autofaturën e lëshuar nga blerësi, duke i kthyer fermerit 10% të vlerës. Kjo politikë synon të kompensojë TVSH-në që fermerët paguajnë për inputet bujqësore, si plehrat kimike, farat dhe fidanët, duke ulur kostot dhe duke nxitur formalizimin e sektorit.
Më herët, nga viti 2019 deri në fund të vitit 2021, inputet bujqësore kanë qenë të përjashtuara nga TVSH-ja. Ndërsa nga 1 janari 2022, pas ndryshimeve fiskale, për to u vendos një normë TVSH-je prej 10%.
