Në tregun e brendshëm financiar, qeveria shqiptare ka zhvilluar më 4 maj ankandin për obligacionet 20-vjeçare, një instrument afatgjatë që synon të tërheqë investitorë me horizont të zgjeruar kohor.
Sipas të dhënave zyrtare nga Ministria e Financave, në këtë ankand u shpall një shumë prej rreth 2 miliardë lekësh, ndërsa kërkesa nga tregu ishte dukshëm më e lartë, duke arritur mbi 2 miliardë lekë. Nga kjo shumë, u pranuan rreth 1.78 miliardë lekë, që tregon interes të qëndrueshëm nga investitorët.
Yield-i uniform i pranuar u fiksua në nivelin 6.50%, ndërsa yield-i maksimal i kërkuar arriti deri në 7.20%. Ky nivel kthimi e bën këtë instrument një nga më tërheqësit në segmentin e borxhit të brendshëm, duke pasqyruar si maturitetin e gjatë, ashtu edhe pritshmëritë për normat e interesit në të ardhmen.
Ky rezultat është sinjal i besimit të investitorëve në stabilitetin afatgjatë të ekonomisë dhe financave publike, por edhe si një alternativë konkurruese ndaj formave të tjera të kursimit.
Ndërkohë, gjatë muajit maj, individët dhe institucionet kanë disa mundësi të tjera për të ivestuar në tituj qeveritarë. Sipas kalendarit të publikuar, gjatë këtij muaji do të zhvillohet ankandi i bonove të thesarit 6-mujore, rihapje e obligacioneve 2-vjeçare, rihapje e obligacioneve referencë 5-vjeçare, rihapje e obligacioneve 3-vjeçare, emetim i ri për obligacione 7-vjeçare dhe bono thesari 12-mujore.
Këto instrumente ofrojnë alternativa të ndryshme, nga investime afatshkurtra me likuiditet të lartë, deri te obligacione afatmesme dhe afatgjata me norma më të favorshme kthimi.
Në një kohë kur normat e interesit mbeten relativisht tërheqëse, titujt qeveritarë vijojnë të konsiderohen si një ndër format më të sigurta të investimit në tregun vendas, veçanërisht për kursimtarët që kërkojnë stabilitet dhe kthim të parashikueshëm./tvscan.al
