Administrata Tatimore po përgatit për vitin 2026 një ndërhyrje të thellë në sektorin e turizmit, me synim formalizimin e plotë të një industrie që është rritur shpejt, por që vazhdon të ketë nivele të larta informaliteti.
Sipas planit, do të forcohet monitorimi përmes të dhënave në kohë reale dhe integrimit të platformave si Booking dhe Airbnb, ndërsa do të shtohen kontrollet ndaj bizneseve që nuk raportojnë saktë të ardhurat apo punësimin. Në fokus janë edhe problemet me pagat minimale fiktive dhe fiskalizimin e paplotë.
Administrata synon të rrisë deklarimet e TVSH-së (6% për akomodimin dhe 20% për shërbimet bar-restorant), duke zgjeruar bazën e tatimpaguesve. Subjektet me sjellje të dyshimta, si xhiro zero apo rënie të pajustifikuar në sezon, do të përballen me auditime të menjëhershme.
Kontrollet në terren do të intensifikohen, përfshirë verifikime pa paralajmërim të punonjësve dhe pagave reale. Një rol të rëndësishëm do të ketë edhe inteligjenca artificiale, që do të analizojë faturat fiskale dhe do të ndihmojë në identifikimin e shkeljeve.
Po ashtu, do të monitorohen në kohë reale edhe platformat online për të krahasuar aktivitetin me deklarimet tatimore. Fokusi shtrihet edhe te agroturizmi dhe turizmi malor, ku konstatohet informalitet i lartë.
Përveç kontrolleve, do të ketë edhe komunikim me bizneset përmes njoftimeve dhe fushatave informuese. Megjithatë, për shkelësit parashikohen masa të forta, si bllokimi i pajisjeve të faturimit dhe ndjekja penale. Objektivi final është arritja e përputhjes së plotë mes faturimit dhe xhiros së deklaruar deri në fund të 2026./skyweb.al
