Lufta në Iran dhe tensionet në tregjet globale të naftës po shtyjnë gjithnjë e më shumë konsumatorë drejt makinave elektrike, ndërsa rritja e çmimeve të karburanteve po ndryshon ritmin e tregut automobilistik në Europë dhe Azi.
Sipas të dhënave të BloombergNEF, shitjet globale të automjeteve elektrike u rritën ndjeshëm në muajin mars, vetëm katër javë pas nisjes së bombardimeve dhe tensioneve të reja në Lindjen e Mesme.
Në Francë, Gjermani dhe Mbretërinë e Bashkuar u shitën mbi 206 mijë automjete elektrike, një rritje prej 44% krahasuar me të njëjtën periudhë të vitit të kaluar.
Rritje të fortë pati edhe Koreja e Jugut, ku transaksionet e makinave elektrike u dyfishuan, ndërsa në Itali, një nga tregjet më të ngadalta në elektrifikim, shitjet e automjeteve me bateri u rritën me 67%.
Ekspertët lidhin këtë zhvillim me dy faktorë kryesorë: rritjen e çmimeve të benzinës dhe hyrjen masive të modeleve më të lira nga prodhuesit kinezë.
“Të dhënat tregojnë se kalimi drejt lëvizshmërisë elektrike mund të ndodhë me ritme të shpejta kur përputhen kushtet e tregut dhe politikat mbështetëse. Përkimi me krizën e fundit të çmimeve të naftës është domethënës”, deklaroi Peter Mock nga International Council on Clean Transportation.
Sipas raportit, gjatë muajit mars u shitën globalisht rreth 1.1 milion automjete elektrike, ndërsa 17% e makinave të reja të shitura në botë ishin plotësisht elektrike.
Në të kundërt, tregje të mëdha si SHBA, Kina dhe Kanadaja regjistruan rënie të shitjeve të automjeteve elektrike.
Analistët thonë se në Kinë konsumatorët nuk janë goditur fort nga rritja e çmimeve të karburanteve, ndërsa në SHBA tregu u ndikua nga përfundimi i disa subvencioneve federale dhe orientimi i blerësve drejt makinave elektrike të përdorura.
Ndërkohë, eksportet kineze të automjeteve elektrike dhe hibride arritën rekord të ri në mars, me një rritje prej 140% krahasuar me një vit më parë.
Australia, Belgjika dhe Gjermania ishin ndër tregjet me rritjen më të madhe të importeve të automjeteve elektrike kineze.
Në Europë, tregu është zgjeruar ndjeshëm, me afro 400 modele elektrike tashmë në dispozicion të konsumatorëve, shumë prej tyre nga prodhues kinezë.
Rritja e shitjeve është ndihmuar edhe nga politikat e reja qeveritare. Gjermania riktheu subvencionet deri në 6 mijë euro për blerjen e makinave elektrike, ndërsa Franca forcoi detyrimet për elektrifikimin e flotave të kompanive.
Një nga shembujt e këtij ndryshimi është ai i Graham Kettlewell, një kimist atmosferik 62-vjeçar nga Australia, i cili bleu një makinë elektrike kineze BYD Dolphin pas rritjes së fortë të çmimeve të karburanteve.
Ai tha se kostot javore të transportit i kanë rënë nga 100 dollarë në vetëm 4 dollarë falë makinës elektrike dhe paneleve diellore në shtëpinë e tij.
Analistët paralajmërojnë se nëse tensionet në Lindjen e Mesme vazhdojnë dhe çmimet e naftës mbeten të larta, ritmi i kalimit drejt automjeteve elektrike mund të përshpejtohet edhe më shumë në vitet e ardhshme./bloomberg
