Instituti i Shëndetit Publik zhvilloi një konferencë për shtyp pas shpërthimit të hantavirusit në një anije turistike që ishte nisur nga Argjentina, me pasagjerë nga vende të ndryshme të botës.
Epidemiologu Artan Simaku sqaroi se, megjithëse ky lloj hantavirusi mund të transmetohet nga njeriu te njeriu, ai nuk përhapet me të njëjtën lehtësi si koronavirusi. Ai theksoi se sistemi shëndetësor është i përgatitur për të përballuar situatën dhe se institucionet shqiptare janë në kontakt të vazhdueshëm me organizatat europiane dhe botërore të shëndetësisë për të ndjekur çdo zhvillim.
Në përgjithësi, hantavirusi lidhet me brejtësit, kryesisht minjtë dhe ketrat. Infektimi tek njerëzit ndodh zakonisht përmes thithjes së grimcave të virusit që mund të gjenden në ajër nga urina, jashtëqitjet ose pështyma e këtyre kafshëve.
I pyetur për masat e dezinfektimit dhe kontrollit ndaj brejtësve, epidemiologu dha sqarime lidhur me procedurat parandaluese.
Aktualisht nuk ekziston një ilaç specifik që eliminon virusin, por diagnoza e hershme dhe kujdesi i specializuar mjekësor janë thelbësorë për trajtimin dhe menaxhimin e sëmundjes.
