Grupi ajror Air France-KLM po shqyrton mundësinë e një ndryshimi të rëndësishëm në identitetin e tij korporativ, si pjesë e strategjisë për zgjerim dhe konsolidim në tregun europian të aviacionit.
Një nga emrat që po diskutohet është “The Blue Group”, një referencë ndaj ngjyrës blu që lidhet me markat Air France, KLM dhe Scandinavian Airlines, ku grupi franco-holandez zotëron tashmë një pjesëmarrje prej afro 20%.
Riemërtimi i mundshëm do t’i jepte kompanisë një identitet më të gjerë dhe më neutral, sidomos në një periudhë kur Air France-KLM po ndjek mundësi të reja bashkëpunimi, investimi apo blerjeje në Europë.
Në këtë kuadër, në raportime përmendet edhe interesi i mundshëm për TAP Air Portugal, kompaninë kombëtare ajrore të Portugalisë.
Megjithatë, deri tani nuk ka asnjë konfirmim zyrtar se ndryshimi i emrit do të ndodhë. Brenda grupit, sipas të njëjtave raportime, ka ende rezerva për braktisjen e emrit Air France-KLM, një markë e konsoliduar prej vitesh në tregun ndërkombëtar të aviacionit.
Nëse vendimi konkretizohet, ai do të shënonte një lëvizje të madhe strategjike për grupin, duke sinjalizuar ambicien për t’u pozicionuar jo vetëm si bashkim mes dy kompanive historike, Air France dhe KLM, por si një platformë më e gjerë europiane në sektorin e transportit ajror. /skyweb.al
