Shqipëria vlerëson se ka përmbushur kushtet teknike për mbylljen e negociatave me Bashkimin Evropian në tre kapituj: marrëdhëniet me jashtë, kërkimin shkencor, si dhe arsimin e kulturën.
Deklarata u bë nga ministrja e Shtetit dhe kryenegociatorja Majlinda Dhuka gjatë raportimit në Komisionin Parlamentar për Evropën dhe Punët e Jashtme. Sipas saj, masat e ndërmarra nga Shqipëria për këta kapituj i janë dërguar tashmë Komisionit Evropian, ndërsa Tirana pret vlerësimin zyrtar nga Brukseli.
Dhuka tha se puna është përqendruar te 10 kapitujt e parë të negociatave, për të cilët Shqipëria duhet të plotësojë 27 kushte për mbyllje. Nga këta, tre kapituj konsiderohen të përfunduar teknikisht, ndërsa shtatë të tjerë ndodhen në një fazë të avancuar.
“Për tre nga këta kapituj mendojmë se i kemi përmbushur teknikisht të gjitha kushtet. Masat e marra i janë transmetuar Komisionit Evropian dhe jemi në pritje të vlerësimit nga ana e tyre”, u shpreh Dhuka.
Kapitujt ku, sipas qeverisë, puna teknike është përmbyllur janë kapitulli 30 për marrëdhëniet me jashtë, kapitulli 25 për kërkimin shkencor dhe kapitulli 26 për arsimin dhe kulturën.
Një pjesë e rëndësishme e diskutimit u përqendrua edhe te grupkapitulli i parë, i njohur si “Bazat e anëtarësimit”, i cili hapet i pari dhe mbyllet i fundit në procesin e negociatave. Ky grupkapitull përfshin fusha kyçe si drejtësia, të drejtat themelore, siguria dhe liria.
Dhuka tha se Shqipëria ka punuar për plotësimin e 24 kushteve të ndërmjetme në fushën e drejtësisë dhe sigurisë, të cilat përfshinin 92 drejtime prioritare veprimi. Sipas saj, këto detyrime janë përmbushur në masë të gjerë, ndërsa në fund të janarit dhe fillim të shkurtit vendi mori vlerësim pozitiv nga Komisioni Evropian për progresin e arritur.
Aktualisht, sipas kryenegociatores, në Këshillin e Bashkimit Evropian po vijon diskutimi mes 27 vendeve anëtare për raportin e progresit të Shqipërisë dhe për kushtet që do të vendosen për mbylljen e negociatave në kapitullin 23, që lidhet me drejtësinë dhe të drejtat themelore, si dhe kapitullin 24, që mbulon drejtësinë, lirinë dhe sigurinë.
Në total, Bashkimi Evropian i ka vendosur Shqipërisë 101 kushte për mbylljen e negociatave në grupkapituj të ndryshëm.
Grupkapitulli më i vështirë mbetet ai për Agjendën e Gjelbër dhe Lidhjen e Qëndrueshme, ku përfshihen çështje si mjedisi, klima, transporti dhe energjia. Ky grupkapitull ka edhe numrin më të lartë të kushteve për mbyllje, gjithsej 22.
Përmbushja teknike e kushteve nga pala shqiptare nuk nënkupton mbyllje automatike të kapitujve, pasi vendimi final varet nga vlerësimi i Komisionit Evropian dhe nga qëndrimi i vendeve anëtare të Bashkimit Evropian. /skyweb.al
