Ekspertët e shëndetit publik në Shqipëri kërkojnë rritjen e taksave për pijet me sheqer dhe ushqimet e pashëndetshme, si një mënyrë për të frenuar rritjen alarmante të obezitetit në vend. Sipas të dhënave të ISHP për vitin 2025, mbi 30% e burrave, 28% e grave dhe 14% e fëmijëve shqiptarë janë obezë.
Studimi “Politikat Fiskale Për Shëndetin” propozon që produktet me shumë sheqer, yndyrë dhe kripë të bëhen më të shtrenjta, ndërsa ushqimet e shëndetshme si frutat dhe perimet të subvencionohen për t’u bërë më të përballueshme për qytetarët.
Ekspertët theksojnë se vende si Mbretëria e Bashkuar, Franca dhe Hungaria kanë pasur rezultate pozitive nga këto politika, duke ulur konsumin e produkteve të dëmshme dhe duke nxitur prodhuesit të reduktojnë sheqerin në produktet e tyre.
Sipas tyre, edhe Shqipëria duhet të ndjekë rekomandimet e Organizatës Botërore të Shëndetësisë për të mbrojtur shëndetin publik dhe për të ulur kostot e larta që sjellin sëmundjet kronike si diabeti dhe problemet kardiovaskulare./skyweb.al
