Inspektoriati Kombëtar i Mbrojtjes së Territorit ka konfirmuar se dy objekte në qytetin që po ndërton Mohamed Alabbar në Portin e Durrësit kanë pësuar fundosje deri në 30 centimetra, duke vërtetuar investigimin e emisionit Piranjat në Syri TV.
Përmes një deklarate zyrtare, IKMT bëri të ditur se grupi i posaçëm i inspektimit, i ngritur për verifikimin e situatës në terren, ka konstatuar ulje në dy objekte të projektit.
“Në përfundim të inspektimit, raporti topografik i Institutit të Ndërtimit konfirmon se: Objekti 02, me fazë ndërtimore 1, 6, 7 dhe 8 kate mbi tokë dhe 1 kat nëntokë, ka pësuar ulje prej 28 cm; Objekti 04, me fazë ndërtimore 1, 6, 7, 8 dhe 10 kate mbi tokë dhe 1 kat nëntokë, ka pësuar ulje prej 18 cm”, deklaron IKMT.
Pas këtyre konstatimeve, Inspektoriati thekson se i është kërkuar kompanisë zbatuese marrja e masave korrigjuese.
“Nisur nga këto konstatime, IKMT i është drejtuar zyrtarisht kompanisë zbatuese të projektit, duke kërkuar marrjen e menjëhershme të masave për realizimin e projekt-përforcimeve të nevojshme teknike, të cilat garantojnë qëndrueshmërinë e strukturave”, vijon deklarata.
Sipas IKMT-së, projektet e përforcimit duhet të marrin miratimin e autoriteteve ligjore përkatëse përpara nisjes së zbatimit, me qëllim garantimin e respektimit të kushteve teknike të planifikimit dhe punimeve të ndërtimit.
