Në Vlorë, drejtimi i Kadastrës po merr ngjyrime gjithnjë e më interesante.
Pas një serie të gjatë rotacionesh, ku drejtuesit janë ndërruar me ritmin e stinëve, pothuajse çdo 3 deri në 4 muaj, duket se është koha për një eksperiment të ri.
Kësaj here, pas konsumit të plotë të rezervave socialiste, rradhën e ka marrë një figurë nga e djathta.
Në krye të Kadastrës së Vlorës është emëruar ish-kryetari i Partisë Demokratike të degës së qytetit, Genc Deromemaj.
Një emër i njohur për vlonjatët, pasi ka qenë edhe kandidat për kryetar bashkie në garën kundër Dritan Lelit, ku humbja e tij u regjistrua në llogaritë e zakonshme zgjedhore të opozitës.
Kadastra e Vlorës, një institucion që duket sikur funksionon më shumë si pikë grumbullimi eksperiencash të shkurtra drejtuese, vazhdon të mbetet epiqendra e paqëndrueshmërisë administrative, kryesisht për shkak të problematikave të përhershme të pronave bregdetare.
Më shumë se 15 drejtues janë ndërruar në pak vite, ritëm që, për cilindo tjetër institucion, do konsiderohej rekord botëror menaxhimi dinamik.
Emërimi i Deromemajt shihet si një përpjekje për të testuar edhe variantin “demokrat i natyralizuar”, ndoshta me shpresën që rotacioni politik t’i sjellë më në fund qetësi një institucioni ku çdo drejtues i ri niset me të njëjtën ambicie: të zgjasë më shumë se paraardhësi. /skyweb.al
