Greqia po konsiderohet tashmë një shembull europian në luftën kundër obezitetit tek fëmijët, pasi programet kombëtare të ndërmarra vitet e fundit kanë sjellë rezultate konkrete në përmirësimin e ushqyerjes dhe aktivitetit fizik tek të miturit. Organizata Botërore e Shëndetësisë (OBSH) e ka cilësuar vendin si një “model” për mënyrën se si ka trajtuar këtë problematikë.
Sipas të dhënave të publikuara nga autoritetet greke, mbi 75% e prindërve janë informuar ose janë përfshirë në programet kombëtare kundër obezitetit. Iniciativa është zhvilluar në bashkëpunim me UNICEF dhe është fokusuar tek shkollat, familjet dhe profesionistët e shëndetësisë.
Programi ka përfshirë këshillim ushqimor falas për më shumë se 1,900 fëmijë mbipeshë ose obezë, përmes rreth 13 mijë seancave individuale me specialistë të ushqyerjes. Tetë në 10 fëmijë që morën pjesë në trajtim arritën të humbnin peshë dhe të normalizonin indeksin e masës trupore.
Në të njëjtën kohë, mbi 1,100 pediatër dhe profesionistë të shëndetit janë trajnuar për monitorimin dhe parandalimin e obezitetit tek fëmijët. Gjithashtu janë krijuar platforma digjitale për referime dhe ndjekje më të mirë të rasteve.
Një pjesë e rëndësishme e nismës ishte edhe programi “Ushqim për Veprim”, i cili u zbatua në shkolla në të gjithë vendin. Mijëra mësues, prindër dhe nxënës morën pjesë në seminare, aktivitete sportive dhe punëtori edukative mbi ushqimin e shëndetshëm. Mbi 130 mijë vakte të shëndetshme dhe fruta të freskëta u shpërndanë në shkollat fillore.
Autoritetet greke raportojnë gjithashtu rritje të ndjeshme të ndërgjegjësimit tek prindërit për rekomandimet e OBSH-së mbi ushqyerjen dhe aktivitetin fizik. Ndërkohë, pjesëmarrja e fëmijëve në sportet e organizuara është rritur nga 52.5% në 60%.
Ekspertët vlerësojnë se, nëse këto politika vazhdojnë, normat e obezitetit tek fëmijët në Greqi do të vijojnë të bien deri në vitin 2040. /skyweb.al
