Policia e Shtetit ka arrestuar punonjësin e shoqërisë private të sigurisë, Geraldo Biba, pas publikimit të pamjeve filmike ku ai shfaqet duke goditur me grusht shtetasin E. S. gjatë tubimit të banorëve të Zvërnecit, të zhvilluar më 30 maj 2026 në vendin e quajtur “Portonovë”.
Sipas Policisë së Shtetit, menjëherë pas publikimit të pamjeve, Drejtori i Përgjithshëm i Policisë urdhëroi ngritjen e një grupi të posaçëm hetimor për të analizuar dhe hetuar të gjitha veprimet e ndodhura gjatë tubimit.
Në vijim të veprimeve hetimore, është bërë identifikimi dhe shoqërimi i Geraldo Bibës, 32 vjeç, banues në Durrës.
Në përfundim të veprimeve të para, ai është arrestuar në flagrancë, i dyshuar për veprat penale “Heqja e paligjshme e lirisë” dhe “Plagosja e lehtë me dashje”.
Sipas hetimeve paraprake, Biba ka goditur me grusht shtetasin E. S. dhe më pas, në bashkëpunim me Artur Gramin dhe Gazment Vathin, të dy të proceduar penalisht, e kanë tërhequr me forcë drejt vendit të rezervuar për rojet, duke i shkaktuar dëmtime të lehta trupore.
Paralelisht me hetimin penal, Drejtori i Përgjithshëm i Policisë ka urdhëruar Drejtorinë e Standardeve Profesionale për nisjen e menjëhershme të hetimit disiplinor ndaj gjithë zinxhirit komandues të Drejtorisë Vendore të Policisë Vlorë.
Hetimi do të fokusohet te masat e marra dhe mënyra e menaxhimit të tubimit të zhvilluar nga banorët e Zvërnecit.
Ngjarja ka ngritur pikëpyetje mbi rolin e punonjësve të sigurisë private në menaxhimin e situatave të tilla dhe mbi reagimin e strukturave të Policisë gjatë tubimit, sidomos pas pamjeve ku protestuesi shihet i goditur dhe i tërhequr me forcë.
Policia e Shtetit deklaron se është e vendosur të respektojë të drejtat dhe liritë themelore të qytetarëve, të garantojë sigurinë e jetës dhe të pronës, si dhe të ndëshkojë çdo punonjës policie që neglizhon detyrën apo abuzon me të. /skyweb.al
