Kryeministri Edi Rama ka mbrojtur projektin turistik që parashikohet të zhvillohet në Zvërnec, duke e cilësuar atë si një investim të jashtëzakonshëm që lidhet me vizionin për ta kthyer Shqipërinë në një destinacion të rëndësishëm të turizmit global.
Gjatë fjalës së tij, Rama tha se Shqipëria e së ardhmes duhet të jetë një vend që tërheq turistë me fuqi të lartë blerëse dhe investime strategjike që sjellin zhvillim ekonomik.
“Kjo është Shqipëria që çdokush do të vijojë dhe jo si më parë. Është Shqipëria e 12 milionë turistëve. Shqipëria duhet të hyjë në listën e vendeve të turizmit global që sjellin investime dhe konsumatorë të nivelit të lartë që i lënë paratë këtu”, u shpreh kryeministri.
Sipas tij, vendi nuk duhet të trembet nga projekte të mëdha zhvillimore, veçanërisht kur ato mbështeten nga investitorë të njohur ndërkombëtarë.
“Shqipëria duhet të jetë një vend që nuk ka frikë nga një projekt i jashtëzakonshëm si ky, ku partnerë të jashtëzakonshëm janë bërë bashkë për të investuar 4 miliardë euro”, deklaroi Rama.
Kryeministri kundërshtoi gjithashtu pretendimet e ngritura për origjinën e kapitalit që do të financojë projektin, duke theksuar se investitorët nuk janë kompani ndërtimi, por investitorë që kanë hyrë në projekt si pronarë të terreneve të blera në përputhje me ligjin.
“S’janë ndërtues këta investitorë. Janë investitorë si pronarë të terrenit që e kanë blerë me para të mbikëqyrura në mënyrë strikte nga agjencia jonë kundër pastrimit të parave dhe nga partnerët ndërkombëtarë që bashkëpunojnë me atë agjenci”, tha ai.
Rama sqaroi se kapitali i investimit vjen nga Katari dhe jo nga Izraeli, siç është pretenduar në disa reagime publike.
“Janë para të mbikëqyrura dhe janë nga Katari, jo nga Izraeli”, deklaroi kryeministri.
Debati për projektin në Zvërnec është intensifikuar javët e fundit pas protestave të banorëve dhe aktivistëve, si dhe pas incidenteve të dhunshme të regjistruara gjatë kundërshtimeve ndaj investimit. Paralelisht, SPAK po zhvillon hetime për çështje që lidhen me pronat në zonë, ndërsa qeveria vijon të mbrojë projektin si një investim strategjik për zhvillimin e turizmit shqiptar. /skyweb.al
