Kryeministri Edi Rama ka folur me tone personale për debatin e krijuar rreth projektit në Zvërnec të Vlorës, duke thënë se reagimet dhe akuzat e ngritura ndaj tij e kanë bërë për herë të parë të mendojë edhe largimin nga detyra.
Duke folur para mbledhjes së Grupit Parlamentar të Partisë Socialiste, Rama tha se pas ngjarjes në Zvërnec dhe pas shpërndarjes së pretendimeve për pronat dhe investimin në këtë zonë, është ndjerë i goditur nga mënyra se si, sipas tij, është deformuar e vërteta.
Kreu i qeverisë u ndal veçanërisht te ato që i cilësoi shpifje të përditshme, të cilat sipas tij helmojnë qytetarët dhe krijojnë perceptimin se qeveria po vepron kundër interesit publik.
“Bëjnë përditë krimin e helmimit të njerëzve me shpifje. Si mund të jem unë kundër jush dhe kundër vetes dhe si mund të jenë gazetat greke aleate me ju? Ka diçka që nuk shkon”, tha Rama.
Kryeministri tha se kjo situatë e ka prekur personalisht, deri në pikën që ka menduar të largohet dhe të tërhiqet nga detyra.
“Kjo është ndjesia ime dhe për herë të parë më kanë bërë të mendoj edhe që t’ju përulem thellë dhe t’ju lë e të iki në katund”, u shpreh ai.
Megjithatë, Rama tha se ka zgjedhur të mos tërhiqet, por të vazhdojë të drejtojë vendin sipas bindjes së tij për zhvillimin e Shqipërisë.
“Por kam zgjedhur të bëj atë që kam bërë gjithmonë. Të udhëheq drejt asaj Shqipërie që e dua po aq sa edhe ju dhe të udhëheq këtë që kemi nisur bashkë dhe i kemi dhënë vlerë flamurit tonë”, deklaroi kryeministri.
Deklarata e Ramës vjen pas reagimeve të forta publike për dhunën ndaj protestuesve në Zvërnec, ku persona të sigurisë private u filmuan duke tërhequr zvarrë një protestues gjatë kundërshtimeve për projektin turistik në zonë. /skyweb.al
