Më shumë se 5 mijë fluturime në Shtetet e Bashkuara janë anuluar ose kanë pësuar vonesa pas vendimit të Departamentit të Transportit për t’i reduktuar ato me 10%. Situata ka shkaktuar kaos në aeroportet amerikane, ndërsa pasojat po ndihen edhe nëpër Europë.
Reduktimi i fluturimeve në shkallë kombëtare ka krijuar probleme të mëdha në aeroportet kryesore. Vetëm të premten u anuluan mbi 1 mijë fluturime dhe rreth 4 100 të tjera u përballën me vonesa të gjata.
Kjo gjendje u shkaktua pas vendimit të Departamentit të Transportit dhe Autoritetit të Fluturimeve Ajrore për të larguar nga puna dhjetëra kontrollorë ajrorë në 40 prej aeroporteve më të ngarkuara. Për 37 ditë, ata kishin punuar pa pagesë për shkak të mungesës së një marrëveshjeje për buxhetin e pjesshëm mes republikanëve dhe demokratëve në Kongres.
Sipas autoriteteve, shumë prej kontrollorëve ishin detyruar të punonin në dy vende për të siguruar të ardhura, gjë që kishte çuar në nivele të rrezikshme lodhjeje, duke rrezikuar sigurinë e koordinimit të fluturimeve. Për të shmangur rrezikun ndaj mijëra pasagjerëve, qeveria urdhëroi pezullimin e tyre nga detyra.
Kaosi në SHBA ka shkaktuar vonesa zinxhir edhe në aeroportet ndërkombëtare të Europës dhe më gjerë. Aktualisht, reduktimi i fluturimeve është në nivelin 4%, por pritet të rritet gradualisht në ditët në vijim deri në 10%. Autoritetet paralajmërojnë se gjatë fundjavës së ardhshme, nëse kriza politike nuk zgjidhet, numri i fluturimeve të ndërprera mund të arrijë deri në 20%. /Skyweb.al
