Pavarësisht zgjerimit të flotës së mjeteve të peshkimit vitet e fundit, prodhimi i peshkut në Shqipëri po tregon një tendencë të qartë rënieje.
Të dhënat më të fundit të INSTAT për vitin 2024 konfirmojnë tkurrjen e ndjeshme të sasisë së peshkut të zënë në të gjitha kategoritë ujore.
Në total, gjatë vitit 2024 u kapën 16.452 tonë peshk, duke shënuar një rënie prej 14.9% krahasuar me një vit më parë, kur sasia ishte 19.338 tonë. Rënia prek thuajse të gjitha kategoritë e peshkimit.
Në det dhe bregdet, prodhimi ra me 18.1%, duke zbritur në vetëm 554 tonë në bregdet dhe 3.869 tonë në total për peshkimin detar. Në ujërat e brendshme u kapën 4.505 tonë, ndërsa akuakultura, që përbën peshën kryesore me 43.6% të totalit, shënoi gjithashtu rënie me 21.6%, duke prodhuar 7.165 tonë peshk.
Brenda kategorive të veçanta, vetëm molusqet regjistruan rritje me 14.5%, ndërsa lagunat shënuan rënien më të fortë me 33% më pak zënie krahasuar me 2023.
Speciet kryesore të kapura në det dhe lagunë vazhdojnë të jenë karkaleci i thellësisë (891 tonë), merluci (735 tonë) dhe sardelja (549 tonë), ndërsa në ujërat e brendshme mbizotërojnë karasi (1.626 tonë), skorta (1.528 tonë) dhe krapi (430 tonë).
Paradoksi i këtyre shifrave është se, megjithëse flota e anijeve të peshkimit ka vijuar të zgjerohet, sasia e peshkut të zënë vazhdon të bjerë.
Shkak për këtë rënie mendohet të jenë mbipeshkimi, ndryshimet klimaterike, ndotja e ujërave dhe mungesa e politikave të qëndrueshme të menaxhimit të resurseve ujore. /skyweb.al
