Presidenti i Republikës, Bajram Begaj, zhvilloi sot një vizitë zyrtare në rajonin e Kalabrisë, ku u prit nga autoritetet më të larta vendore. Vizita u zhvillua në kuadër të angazhimeve të ndërmarra për forcimin e lidhjeve me komunat arbëreshe, si dhe për nderimin e figurës së Heroit Kombëtar, Gjergj Kastrioti Skënderbeu, përmes vendosjes së bustit të tij në sheshet e disa prej këtyre komunave.
Gjatë qëndrimit në Kalabri, Presidenti Begaj nënvizoi rëndësinë e këtyre takimeve jo vetëm në funksion të ruajtjes së identitetit dhe trashëgimisë kulturore arbëreshe, por edhe në funksion të zgjerimit të bashkëpunimit me rajonet italiane dhe të zhvillimit të mëtejshëm të marrëdhënieve ekonomike ndërmjet dy vendeve.
Kreu i Shtetit i ftoi autoritetet dhe investitorët italianë që të shohin Shqipërinë si një mundësi konkrete investimi për të gjithë rajonin e Ballkanit Perëndimor. “Shqipëria mbetet një faktor paqeje dhe stabiliteti në rajon, e angazhuar për zhvillim dhe bashkëpunim me të gjithë fqinjët,” u shpreh Presidenti Begaj.
Duke vlerësuar rolin e Italisë në integrimin dhe mirëpritjen e komunitetit arbëresh dhe të emigrantëve shqiptarë gjatë dekadave të fundit, Presidenti Begaj nënvizoi se marrëdhëniet ndërmjet Shqipërisë dhe Italisë karakterizohen nga një partneritet strategjik i gjithanshëm. “Italia është partneri ynë kryesor tregtar dhe mbështetësi më i madh i Shqipërisë në rrugëtimin e saj drejt Bashkimit Evropian,” tha ai.
Në një deklaratë për median italiane, Presidenti Begaj theksoi se marrëdhëniet midis Shqipërisë dhe Italisë bazohen në lidhje historike, partneritet politik, ekonomik, kulturor dhe akademik të qëndrueshëm. “Jemi vende aleate në NATO dhe zhvillojmë bashkëpunim të ngushtë në fusha të shumta, përfshirë arsimin e lartë dhe kulturën,” u shpreh Presidenti i Republikës. /skyweb.al
