Ish-futbollisti dhe drejtuesi sportiv Igli Tare është paraqitur këtë të enjte në Prokurorinë e Posaçme, ku ka dhënë shpjegime në kuadër të hetimeve që po zhvillohen ndaj ish-zëvendëskryeministres Belinda Balluku.
Sipas informacioneve, Tare ka sqaruar para hetuesve se një apartament tip dupleks me sipërfaqe 103 metra katrorë në Dhërmi është blerë prej tij në vitin 2018, nëpërmjet një kontrate noteriale dhe me pagesa të kryera përmes sistemit bankar.
Ai ka deklaruar se me Belinda Ballukun ka marrëdhënie miqësore që nga fëmijëria, një fakt që sipas tij njihet prej vitesh në Tiranë. Tare ka shpjeguar gjithashtu se familjet e tyre kanë ruajtur marrëdhënie të afërta dhe frekuentohen prej kohësh.
Në dëshminë e tij, ai ka sqaruar se për shkak të kësaj miqësie i kishte thënë Ballukut se mund të përdorte banesën së bashku me fëmijët gjatë periudhave të pushimeve.
Lidhur me pretendimet për favorizime apo përfitime të mundshme, Tare ka mohuar çdo lidhje me procedurat që po verifikohen nga SPAK.
Sipas tij, procedura e përmendur në Albcontrol i përket vitit 2014 dhe nuk ka lidhje me pretendimet aktuale.
“Me sa jam informuar bëhet fjalë për një procedurë të para 12 vitesh, e cila është e parashkruar dhe pa asnjë lidhje me atë që po hamendësohet”, mësohet të ketë deklaruar ai para hetuesve.
Tare ka theksuar gjithashtu se nuk mund të ngrihen akuza apo të cenohet imazhi i një figure publike mbi bazën e dyshimeve të paprovuara, duke këmbëngulur se çdo veprim i tij është kryer në përputhje me ligjin.
