Kryeministri Edi Rama ka reaguar sërish ndaj protestave qytetare që kundërshtojnë projektin për ndërtimin e një resorti turistik në Zvërnec.
Nga Porto Montenegro në Tivat të Malit të Zi, Rama ka publikuar një mesazh në rrjetet sociale, ku ka krahasuar zhvillimin e zonës ku ndodhej me debatet që po zhvillohen në Shqipëri për investimet e mëdha turistike.
Kreu i qeverisë e cilësoi Porto Montenegron si një “perlë” dhe theksoi se investimi është realizuar nga një person që, sipas tij, dikur ishte përzënë nga Shqipëria.
Në reagimin e tij, Rama u shpreh se Shqipëria humbi mundësi zhvillimi në të kaluarën për shkak të politikave të gabuara, ndërsa shtoi se vendi nuk duhet të humbasë më mundësi të ngjashme.
“Live nga perla që e sollën këtu dikush që e përzunë nga Shqipëria. O çuna, goca na e kaluan njëherë këta vëllezërit e vegjël topin për shalësh, për fajin e honxhobonxhove tanë që e lanë topin ta marrë deti”, shkroi Rama.
Më tej, kryeministri dha një mesazh të drejtpërdrejtë për kundërshtarët e projekteve që qeveria konsideron strategjike, duke deklaruar se ato do të vazhdojnë pavarësisht kundërshtimeve.
“Po tani s’bëhet llaf më, ta harrojnë të gjithë ata që thonë s’duan apo s’na duan, se na kalon prapë huq topi i historisë së Shqipërisë së Re Europiane”, u shpreh ai.
Reagimi i Ramës vjen në një kohë kur protestat kundër projektit turistik në Zvërnec po vijojnë prej disa ditësh. Kundërshtarët e projektit kërkojnë ndalimin e investimit, duke argumentuar se ai prek një zonë me vlera të rëndësishme natyrore dhe mjedisore, ndërsa qeveria e konsideron atë një mundësi zhvillimi ekonomik dhe turistik për zonën.
