Kryeministri Edi Rama ka ashpërsuar tonet ndaj gazetarëve, blogerëve dhe influencuesve që e kanë kritikuar për projektet turistike dhe zhvillimet e fundit në vend, duke i akuzuar se japin leksione morali ndërkohë që, sipas tij, vetë nuk paguajnë taksa dhe përfitojnë para në mënyrë informale.
Në një dalje publike, Rama tha se është e papranueshme që ai të quhet tradhtar nga njerëz që, sipas tij, marrin para “nën dorë”, nuk i deklarojnë të ardhurat dhe më pas shkojnë për pushime në resorte luksoze si Green Coast.
“Ama na tregojnë neve tradhtarë ca gazetarë që marrin lekë nën dorë, nuk paguajnë taksa dhe shkojnë bëjnë pushimet në Green Coast. Pse bëjnë pushime atje?”, u shpreh Rama.
Kryeministri e personalizoi sulmin edhe ndaj gazetarit Mustafa Nano, duke treguar një episod që, sipas tij, kishte ndodhur në zyrën e tij. Rama tha se Nano i kishte kërkuar të bëhej ambasador, duke i thënë se nuk kishte më fuqi për vendin.
“Më bën mua moral Mustafa Nano, që erdhi në zyrën time, u shtri në kolltuk dhe më tha: ‘S’kam fuqi për këtë vend dhe dua të bëhem ambasador’. Dhe i thashë: do ta shohim, meqë kemi pasur shkrimtarë ambasadorë”, deklaroi Rama.
Sipas kryeministrit, Nano u emërua më pas në Zvicër, por nuk arriti ta mbante detyrën deri në fund.
“Shkoi Muçi në Zvicër, nuk mbajti dot një zyrë ku ishte vetëm me një sekretare, e la detyrën në mes dhe vjen më thotë mua si ta bëj detyrën”, tha Rama.
Kreu i qeverisë reagoi edhe ndaj deklaratave se oligarkët hyjnë shpesh në zyrën e tij, duke e quajtur këtë një pretendim absurd.
“Më tregon ai mua se oligarkët hyjnë në mëngjes dhe në darkë në zyrën time. Po ti, mo Muç, spiun i Sigurimit je që e di këtë, kush hyn në zyrën time?”, u shpreh Rama.
Ai shtoi se, nëse akuza të tilla vijnë nga persona publikë si Mustafa Nano, atëherë mund të kuptohet se çfarë ndodh me pjesën tjetër të komentatorëve dhe kritikëve online.
“Po kur e bën Muçi këtë, llogarisni të tjerët”, tha Rama.
Kryeministri vijoi më tej duke sulmuar edhe blogerë dhe influencues që, sipas tij, e akuzojnë për tradhti, ndërkohë që nxjerrin të ardhura online pa kontribuar në sistemin fiskal.
“Më thonë mua tradhtar ca blogerë dhe influencera që nxjerrin online ato që unë kam nxjerrë kur isha i ri dhe nuk i japin asnjë taksë shtetit shqiptar”, deklaroi Rama.
Deklaratat e kryeministrit vijnë në një moment tensionesh të larta publike, pas protestave kundër projektit në Zvërnec dhe kritikave të shumta nga media, aktivistë dhe figura publike. Rama ka zgjedhur të përgjigjet me tone të ashpra, duke e zhvendosur debatin nga projekti dhe protestat te kredibiliteti i kritikëve të tij publikë.
Në thelb, kryeministri akuzoi një pjesë të medias dhe komentatorëve se bëjnë moral publik ndaj qeverisë, ndërsa vetë, sipas tij, nuk respektojnë detyrimet ndaj shtetit dhe përdorin hapësirën online për të prodhuar akuza pa përgjegjësi. /skyweb.al
