Kryeministri Edi Rama ka publikuar pamje nga Liqeni i Shkodrës, pas përfshirjes së tij në Rrjetin Botëror të Rezervave të Biosferës të UNESCO-s.
Në një postim në rrjetet sociale, Rama e cilësoi këtë vendim si një tjetër lajm të rëndësishëm për trashëgiminë natyrore të Shqipërisë dhe për imazhin e vendit si destinacion i gjelbër.
Sipas kryeministrit, futja e Liqenit të Shkodrës në këtë rrjet është rezultat i punës diplomatike, por edhe i kujdesit të treguar për mbrojtjen e kësaj pasurie natyrore.
“Mirëmëngjes dhe me kënaqësinë e një tjetër lajmi të bukur për Shqipërinë e Gjelbër dhe trashëgiminë tonë natyrore, futjen e Liqenit të Shkodrës nga UNESCO në Rrjetin Botëror të Rezervave të Biosferës, rezultat i punës sonë diplomatike, po edhe i kujdesit me përgjegjësi për këtë pasuri shqiptare që i shtohet thesareve të botës së mbrojtur nga UNESCO, ju uroj një javë të mbarë”, shkruan Rama.
Përfshirja në Rrjetin Botëror të Rezervave të Biosferës e vendos Liqenin e Shkodrës mes zonave me rëndësi të veçantë natyrore dhe ekologjike, duke rritur më tej vëmendjen ndaj mbrojtjes dhe promovimit të tij.
