Shtatë vende të Bashkimit Europian i kanë kërkuar Brukselit të mos tërhiqet nga rregullat e forta për uljen e ndotjes nga makinat dhe furgonët.
Danimarka, Franca, Luksemburgu, Holanda, Portugalia, Spanja dhe Suedia paralajmërojnë se zbutja e standardeve të CO2 do të dëmtonte objektivat klimatike, ekonominë europiane dhe sigurinë energjetike.
Debati lidhet me të ardhmen e makinave me benzinë dhe naftë pas vitit 2035. Fillimisht BE kishte synuar ndalimin e shitjes së makinave të reja me motorë me djegie të brendshme, por pas presionit nga disa qeveri dhe prodhues makinash, Komisioni Europian propozoi një variant më të butë: ulje me 90% të emetimeve të CO2 deri në vitin 2035.
Gjermania dhe Italia kanë kërkuar më shumë fleksibilitet për industrinë e makinave. Këtë linjë po e mbështet edhe Partia Popullore Europiane në Parlamentin Europian, me argumentin se ligji duhet të lejojë edhe teknologji të tjera, jo vetëm makinat elektrike.
Por shtatë vendet kundërshtojnë zbutjen e mëtejshme të rregullave. Sipas tyre, Europa duhet të vazhdojë me elektrifikimin e shpejtë të makinave, të ndërtojë më shumë pika karikimi dhe të nxisë qytetarët të blejnë automjete elektrike.
Në dokument thuhet se makinat elektrike e bëjnë Europën më pak të varur nga nafta, krizat gjeopolitike dhe luhatjet e çmimeve të karburanteve. Ato ndihmojnë gjithashtu në uljen e ndotjes dhe në mbrojtjen e konsumatorëve nga rritja e çmimeve të karburanteve.
Shtatë vendet pranojnë se prodhuesit mund të kenë disa lehtësi, por kërkojnë që ato të jenë të kufizuara dhe të mos dobësojnë kalimin drejt makinave elektrike.
Sipas tyre, zbutja e tepërt e rregullave do të krijonte pasiguri për investimet dhe do të ngadalësonte transformimin e industrisë europiane të automjeteve.
