Autoriteti Kombëtar i Ushqimit ka nisur inspektimet në subjektet që tregtojnë apo përgatisin ushqime pranë shkollave, kopshteve dhe çerdheve në të gjithë vendin.
Kontrollet po zhvillohen në fast-food-e, byrektore, piceri, markete dhe pika të tjera tregtimi pranë institucioneve arsimore. Në fokus janë edhe kuzhinat e kopshteve, shkollave dhe çerdheve ku përgatitet ushqim për fëmijët.
Inspektorët e AKU-së do të verifikojnë kushtet e higjienës, respektimin e afateve të përdorimit, origjinën dhe gjurmueshmërinë e produkteve, kushtet higjieno-sanitare dhe etiketimin e ushqimeve.
Gjatë kontrolleve do të merren edhe mostra për analiza fiziko-kimike dhe mikrobiologjike, me qëllim identifikimin e produkteve që mund të përbëjnë rrezik për shëndetin.
AKU bën të ditur se plani i masave synon krijimin e një mjedisi më të sigurt për nxënësit dhe parandalimin e rreziqeve që lidhen me ushqimet e tregtuara dhe të konsumuara pranë shkollave.
Krahas inspektimeve, institucioni do të zhvillojë fushata ndërgjegjësuese për bizneset ushqimore, nxënësit dhe personelin e arsimit parauniversitar, me fokus respektimin e rregullave dhe zgjedhjen e ushqimeve të sigurta.
