Tirana po tërheq gjithnjë e më shumë vëmendjen e investitorëve të interesuar për tregun e qirave afatshkurtra. Kryeqyteti shqiptar renditet në vendin e 68-të ndër 100 qytete europiane ku investimi në prona për Airbnb konsiderohet fitimprurës, sipas analizës së publikuar nga platforma Airbtics, e specializuar në vlerësimin e tregjeve të qirave afatshkurtra.
Studimi evidenton qytetet ku investitorët dhe pronarët kanë mundësi të sigurojnë të ardhura të qëndrueshme falë kërkesës së lartë turistike dhe normave të kënaqshme të zënies gjatë pjesës më të madhe të vitit. Në këtë renditje, Tirana paraqitet si një treg në zhvillim, i cili po përfiton nga rritja e vazhdueshme e turizmit dhe interesit të vizitorëve të huaj për Shqipërinë.
Sipas të dhënave, në Tiranë norma mesatare e zënies së akomodimeve Airbnb arrin në 63%, një tregues që tregon se pronat e listuara shfrytëzohen në një pjesë të konsiderueshme të vitit. Aktualisht në kryeqytet numërohen më shumë se 3,700 njësi Airbnb, ndërsa çmimi mesatar për një natë qëndrimi është rreth 45 euro.
Analiza tregon gjithashtu se investimi fillestar për rinovimin dhe përshtatjen e një prone për këtë lloj aktiviteti kushton mesatarisht rreth 10 mijë euro, një shumë relativisht e përballueshme krahasuar me shumë qytete të tjera europiane. Kjo e bën Tiranën një alternativë interesante për investitorët që kërkojnë të hyjnë në tregun e qirave afatshkurtra pa pasur nevojë për kapitale shumë të mëdha.
Vitet e fundit, Europa është kthyer në një nga destinacionet më tërheqëse për investimet në Airbnb. Rritja e turizmit, zgjerimi i aktiviteteve të biznesit, si dhe numri në rritje i nomadëve dixhitalë kanë shtuar kërkesën për akomodime fleksibël në shumë qytete europiane. Destinacione si Amsterdami, Edinburgu dhe Kopenhageni vazhdojnë të kryesojnë listat e investimeve më fitimprurëse, por edhe qytete më të vogla apo tregje në zhvillim po fitojnë terren.
Kërkesa e lartë nga udhëtarët ndërkombëtarë ka ndikuar në rritjen e të ardhurave për pronarët e Airbnb në shumë vende të Europës. Normat e mira të zënies dhe çmimet konkurruese ditore po e bëjnë këtë sektor një mundësi tërheqëse si për investitorët vendas, ashtu edhe për ata të huaj. /Scan.tv
