Koreja e Jugut po kthehet gjithnjë e më shumë në një destinacion jo vetëm për turizëm, por edhe për kontrolle të plota shëndetësore. Një numër në rritje udhëtarësh po i shtojnë pushimeve në Seul analiza gjaku, ekografi, rezonanca, endoskopi apo kontrolle të tjera preventive.
Sipas Ministrisë së Shëndetësisë së Koresë së Jugut, gjatë vitit 2025 vendi priti rreth 2.01 milionë pacientë të huaj, 71.7% më shumë se një vit më parë.
Pjesa më e madhe e tyre vijnë nga Kina dhe Japonia, ndërsa pasohen nga Tajvani dhe Shtetet e Bashkuara. Arsyeja kryesore është kombinimi i çmimeve më të ulëta, shërbimit të shpejtë dhe mundësisë për të kryer shumë analiza brenda një vizite të vetme.
Në shumë klinika koreane një kontroll i plotë mund të përfundojë brenda disa orësh, ndërsa rezultatet zakonisht dërgohen me email brenda 7 deri në 14 ditësh. Disa qendra ofrojnë edhe shërbim të plotë në anglisht, përfshirë përkthyes gjatë konsultave dhe rezultate të përkthyera.
Një koreano-amerikane që jeton në Nju Jork pagoi rreth 516 dollarë për një paketë të plotë shëndetësore për gratë. Një tjetër turist nga SHBA pagoi rreth 312 dollarë për analiza gjaku, radiografi të kraharorit, ekografi dhe endoskopi, të gjitha të përfunduara brenda rreth tre orësh.
Në një rast tjetër, një udhëtare nga Hong Kongu tha se një paketë e ngjashme në vendin e saj do t’i kushtonte tre deri në katër herë më shumë.
Klinikat koreane janë të orientuara fort drejt diagnostikimit të hershëm, çka e ka bërë kontrollin preventiv pjesë të rëndësishme të sistemit shëndetësor të vendit.
Edhe kompanitë e turizmit mjekësor po përfitojnë nga trendi, duke ofruar paketa që përfshijnë rezervime, përkthim dhe koordinim me spitalet.
Megjithatë, ekspertët këshillojnë që kontrollet të planifikohen në fillim të udhëtimit, pasi disa procedura kërkojnë agjërim, qetësues ose kontrolle të mëtejshme. Po ashtu rekomandohet që rezultatet të ndahen më pas edhe me mjekun personal në vendin e origjinës.
Turizmi mjekësor po bëhet kështu një pjesë gjithnjë e më e dukshme e ofertës së Koresë së Jugut, ku për shumë vizitorë pushimet tashmë kombinohen me një “check-up” të plotë shëndetësor. /BBC
