Administrata Tatimore vijon procesin e rimbursimit të tatimit të mbipaguar për individët që, pas dorëzimit të Deklaratës Individuale Vjetore të të Ardhurave, DIVA 2025, rezultojnë me të drejtë për kthim parash.
Sipas njoftimit zyrtar, deri tani janë rimbursuar rreth 750 mijë euro për 4,535 individë.
Procesi vijon edhe për përfituesit e tjerë, por për një pjesë të tyre procedura nuk ka mundur të përfundojë për shkak të mungesës së të dhënave të llogarisë bankare në sistemin e-Filing.
Administrata Tatimore u bën thirrje individëve që rezultojnë përfitues të plotësojnë sa më shpejt të dhënat bankare, në mënyrë që shuma e rimbursimit të mund të transferohet në llogarinë e tyre.
Për këtë procedurë është publikuar edhe një udhëzim i posaçëm që tregon hapat që duhen ndjekur në e-Filing.
Paralelisht, Tatimet kanë publikuar edhe informacion për fermerët që përfitojnë nga skema e kompensimit përmes autofaturës.
Në materialin shpjegues përcaktohen kushtet që duhet të plotësohen për përfitimin e kompensimit, norma që aplikohet, mënyra e aplikimit dhe afatet përkatëse.
Administrata Tatimore u kërkon përfituesve të verifikojnë të dhënat në sistem dhe të plotësojnë dokumentacionin e nevojshëm për të shmangur vonesat në pagesa.
