Drejtoria e Përgjithshme e Tatimeve bën të ditur se individët dhe bizneset kanë kursyer rreth 84 milionë euro në kosto fiskale falë procesit të rivlerësimit të pasurive të paluajtshme.
Sipas të dhënave zyrtare, kursimi është realizuar gjatë periudhës mars-maj 2026, përmes skemës së rivlerësimit që u mundëson pronarëve të reflektojnë vlerën reale të pasurive të tyre duke përfituar nga lehtësitë ligjore në fuqi.
Tatimet theksojnë se procesi ka ndihmuar në uljen e barrës fiskale si për individët, ashtu edhe për bizneset, duke krijuar mundësi për formalizimin e vlerës së pronave në përputhje me tregun.
Autoritetet kujtojnë se afati për kryerjen e rivlerësimit përfundon më 31 dhjetor 2026, ndërsa u bëjnë thirrje qytetarëve dhe subjekteve të interesuara të shfrytëzojnë këtë mundësi brenda afatit të përcaktuar.
Sipas DPT-së, procesi i rivlerësimit vijon të mbetet një nga instrumentet kryesore për përditësimin e vlerës së pasurive të paluajtshme dhe përfitimin nga lehtësitë fiskale të parashikuara në legjislacion.
