Qeveria ka ndryshuar rregullat për përdorimin dhe privatizimin e pronave shtetërore, duke u hapur rrugën përfituesve të kontratave “1 euro” që të kërkojnë blerjen e pasurive.
Mundësia e blerjes u jepet subjekteve që kanë marrë me qira ose enfiteozë prona shtetërore me sipërfaqe mbi 500 metra katrorë, me tarifën simbolike “1 euro/kontrata”.
Për t’u pranuar kërkesa, investitori duhet të ketë realizuar brenda afatit kontraktor investime mbi 5 milionë euro.
Investimi duhet të jetë gjithashtu më i lartë se 750% e vlerës së pronës që kërkohet të blihet, ndërsa pasuria nuk duhet të jetë pjesë e pronave shtetërore të patjetërsueshme.
Plotësimi i kushteve do të provohet përmes dokumentacionit kontraktor, financiar dhe teknik.
Blerja e pronës nuk e çliron subjektin nga detyrimi për të realizuar plotësisht investimin dhe objektivat e përcaktuara në planin fillestar të biznesit.
Ky detyrim do të përfshihet në kontratën e shitjes dhe do të regjistrohet si kufizim në kartelën e pasurisë.
Deri në përfundimin e investimit, blerësi nuk mund t’ia shesë pronën një pale të tretë. Ky ndalim regjistrohet në Kadastër si hipotekë ligjore.
Nëse investitori nuk realizon investimin e premtuar, Ministria e Ekonomisë mund ta zgjidhë kontratën e shitjes në mënyrë të njëanshme.
Në këtë rast, prona e privatizuar i rikthehet shtetit, ndërsa qeveria ka të drejtë të mbajë edhe shumën e paguar nga blerësi.
Rregullat e reja vendosin edhe sanksione gjatë zbatimit të kontratave “1 euro”.
Për pjesën e investimit të parealizuar, qiramarrësi ose enfiteozëmarrësi penalizohet me 10% të vlerës së papërmbushur.
Për çdo vend pune të premtuar, por të pakrijuar, vendoset një penalitet prej 50 mijë lekësh.
Numri i vendeve të punës do të verifikohet sipas mesatares vjetore të punonjësve të deklaruar në administratën tatimore.
Institucionet përgjegjëse duhet të kontrollojnë të paktën një herë në gjashtë muaj realizimin e investimit, nivelin e punësimit, pagesën e qirasë, kamatëvonesat dhe penalitetet.
Udhëzimet përcaktojnë gjithashtu që procedurat e konkurrimit dhe komunikimi me ofertuesit të zhvillohen elektronikisht.
Për ndërtesat shtetërore, tarifa minimale mujore e qirasë caktohet në masën 0,3% të vlerës mesatare të shitblerjes së banesave në bashkinë ku ndodhet prona./skyweb.al
