Autoriteti Kombëtar i Ushqimit ka ushtruar kontroll në ambientet e Premium Beach Hotel në Golem, pas ankesës së një grupi turistësh të huaj që shfaqën shenja helmimi. Ngjarja ka ndodhur disa ditë më parë, pasi turistët kishin konsumuar ushqim në restorantin e hotelit.
Burime të Skyweb.al bëjnë të ditur se turistët janë ndier keq dhe kanë marrë ndihmën e parë, ndërsa më pas u është konfirmuar se simptomat lidheshin me helmim ushqimor.
Pas këtij konstatimi, ata i janë drejtuar Autoritetit Kombëtar të Ushqimit përmes një ankese të dërguar në adresën zyrtare info@aku.gov.al.
Skyweb.al është njohur me ekzistencën dhe përmbajtjen e këtij komunikimi pak ditë pas paraqitjes së ankesës.
Menjëherë pas denoncimit, AKU ka dërguar një grup inspektimi në Premium Hotel.
Gjatë kontrollit janë marrë mostra nga produktet ushqimore të përdorura në restorantin e hotelit, të cilat janë dërguar për analiza laboratorike. Paraprakisht dyshohet se bëhet fjalë për bakterin Escherichia Coli.
Skyweb.al ka parë edhe procesverbalin e mbajtur nga inspektorët gjatë kontrollit.
Iinspektorët dyshojnë se helmimi mund të jetë shkaktuar nga prania e këtij bakteri në djathin e konsumuar nga turistët.
REAGIMI I KOMPANISË
Ndërkohë, në një reagim për redaksinë, kompania Premier Group, e cila zotëron Premium Beach Resort, ka vënë në dispozicion një përgjigje zyrtare të Inspektoratit Shtetëror Shëndetësor, i cili ka kryer një kontroll tjetër, por për ushqimin, por për kushtet higjenosanitare.
Sipas Inspektoratit, gjatë kontrollit u konstatua se subjekti furnizohej me ujë higjienikisht të pastër, bazuar në raport-analizën e ujit nr. 65, të datës 4 maj 2026.
Premier Group dispononte gjithashtu akt-miratimin higjieno-sanitar nr. 1498, të datës 22 korrik 2016.
Sipas dokumentacionit të paraqitur, shërbimi i dezinfektimit, dezinsektimit dhe deratizimit ishte kryer nga kompania “Bioned” më 5 maj 2026.
Inspektorët kanë konstatuar gjithashtu se personeli ishte i pajisur me libreza shëndetësore dhe se produktet ushqimore ruheshin në kushte të përshtatshme higjieno-sanitare.
“Nga kontrolli dhe verifikimi i dokumentacionit dhe kushteve higjieno-sanitare të subjektit, nuk u konstatuan shkelje të kërkesave ligjore dhe higjieno-sanitare në momentin e inspektimit”, thuhet në përgjigjen e ISHSH-së.
Vlen për t’u theksuar se kontrolli i ISHSH ka qenë i një natyre tjetër, s’ka të bëjë me ushqimin e konsumuar nga turistët dhe nuk zëvendëson përgjigjen e analizave nga mostrat e marra prej AKU-së. /skyweb.al
