Autoriteti Rrugor Shqiptar ka reaguar pas shqetësimeve për mungesën e një hyrje-daljeje në zonën e Papërit përgjatë autostradës së re Elbasan–Rrogozhinë.
Sipas ARRSH-së, projekti parashikon ndërtimin e një nyjeje në Papër, e cila do të lidhë me autostradën jo vetëm këtë zonë, por edhe Cërrikun dhe territoret përreth.
Megjithatë, kjo nyje nuk është përfshirë në kontratat që janë aktualisht në zbatim.
ARRSH sqaron se ndërtimi i saj është planifikuar të realizohet në një fazë të mëvonshme, në varësi të vijimësisë dhe planifikimit të projektit.
Kjo do të thotë se segmenti që po ndërtohet aktualisht nuk do ta ketë menjëherë të përfunduar lidhjen direkte me Papërin dhe Cërrikun, edhe pse ajo është pjesë e projektit të përgjithshëm.
Autoriteti Rrugor Shqiptar thekson se do të vijojë të informojë publikun për ecurinë e punimeve dhe fazat e tjera të projektit. /skyweb.al
