Deri më tani, 264 subjekte kanë përfituar nga falja e detyrimeve doganore të papaguara deri në fund të vitit 2014.
Sipas të dhënave nga Drejtoria e Përgjithshme e Doganave, vlera e detyrimeve të fshira arrin në 505 milionë lekë.
Për detyrimet e papaguara deri më 31 dhjetor 2014, ligji parashikon fshirjen automatike të detyrimeve, gjobave dhe kamatëvonesave përkatëse.
Ndërkohë, për detyrimet e krijuara gjatë periudhës 2015–2019, subjektet kanë dy alternativa për të përfituar nga skema lehtësuese.
Ato mund të paguajnë 50% të principalit deri më 30 qershor 2026, duke përfituar faljen e pjesës tjetër të detyrimit, si dhe të të gjitha gjobave e kamatëvonesave.
Alternativa e dytë parashikon pagesën e 75% të principalit deri më 31 dhjetor 2026, me përfitimin e faljes së 25% të mbetur dhe të gjobave e kamatëvonesave.
Për detyrimet e periudhës 2020–2024, fshihen gjobat dhe kamatëvonesat në rast se subjekti paguan të plotë detyrimin kryesor deri më 31 dhjetor 2026.
Administrata doganore do të vijojë evidentimin dhe trajtimin e detyrimeve të papaguara sipas periudhave përkatëse.
Degët doganore do të vazhdojnë identifikimin e rasteve përfituese deri më 31 dhjetor 2026.
Zbatimi i ligjit synon të lehtësojë barrën financiare për bizneset, të nxisë formalizimin dhe të krijojë mundësi për mbylljen e detyrimeve të prapambetura përmes procedurave lehtësuese.
