Kryeministri Edi Rama ka bërë me dije se më 14 korrik, në Bruksel, do të zhvillohet Konferenca e nëntë Ndërqeveritare Shqipëri-BE.
Njoftimin Rama e bëri përmes një postimi në rrjetet sociale, ku ironizoi edhe deklaratat e opozitës për bllokim të negociatave.
Sipas kryeministrit, Shqipëria po vijon procesin e saj europian, pavarësisht akuzave dhe parashikimeve politike të kundërshtarëve.
Rama shkroi se puna e opozitës janë “llafet”, ndërsa fjala e qeverisë është puna.
“SHQIPËRIA NUK NDALET
Thanë negociatat u bllokuan;
thanë Samiti i NATOS u anullua;
thanë qeveria u rrëzua;
thanë ç’nuk thanë e gjë pa thënë s’do lenë, sepse puna e tyre janë llafet ndërsa FJALA JONË ËSHTË PUNA”, shkruan Rama.
Postimi është shoqëruar edhe me një poster me flamingo, të cilin kryeministri e ka përdorur si simbol në komunikimet e fundit politike.
Konferenca ndërqeveritare në Bruksel është një tjetër hap në procesin e negociatave të Shqipërisë me Bashkimin Europian.
Ajo vjen në një moment kur qeveria e paraqet integrimin europian si një nga prioritetet kryesore të mandatit të saj.
