Një pasagjer në një fluturim të Turkish Airlines me destinacion Gjermaninë dyshohet se refuzoi të ulej pranë një gruaje, duke pretenduar se këtë ia ndalonte ligji islamik i Sheriatit.
Situata më pas degjeneroi, ndërsa ai akuzohet se goditi me shuplakë një stjuardesë që ndërhyri për ta qetësuar.
Ngjarja ndodhi gjatë një fluturimi nga Turqia drejt Dyseldorfit. Sipas medias gjermane “Bild”, i dyshuari është një shtetas gjerman 29-vjeçar me origjinë turke.
Policia bëri të ditur se pasagjeri nuk pranoi të zinte vendin e caktuar pranë një gruaje dhe kërkoi të zhvendosej, duke iu referuar rregullave të Sheriatit.
Kur një punonjëse e ekuipazhit iu afrua për të sqaruar situatën, ai dyshohet se e goditi atë me shuplakë në fytyrë.
Pas uljes së avionit në aeroportin e Dyseldorfit, më 1 qershor, në bord ndërhynë autoritetet gjermane. Çështja po hetohet nga Policia Federale e qytetit.
Sipas raportimeve, 29-vjeçari e ka pranuar sulmin. Ende nuk dihet se çfarë mase ligjore do të merret ndaj tij.
Turkish Airlines nuk ka dhënë ende një reagim zyrtar për ngjarjen.
