Trafiku ajror në Itali është përfshirë nga probleme serioze mëngjesin e kësaj të premteje, 16 tetor, pas një defekti teknik në sistemin kombëtar të kontrollit ajror, duke shkaktuar vonesa dhe anulime fluturimesh në disa aeroporte të vendit.
Problemet kanë prekur edhe lidhjet ajrore me Shqipërinë. Sipas agjencisë italiane ANSA, mes fluturimeve të anuluara në aeroportin Fiumicino të Romës është edhe një fluturim drejt Tiranës.
Autoriteti italian i navigimit ajror, ENAV, njoftoi se gjatë natës janë konstatuar anomali në rrjetin e transmetimit të të dhënave që mbështet shërbimet e kontrollit të trafikut ajror në të gjithë territorin italian.
Për të garantuar sigurinë e fluturimeve, duke nisur nga ora 06:00 e mëngjesit janë vendosur kufizime të përkohshme në kapacitetin e menaxhimit të avionëve në hapësirën ajrore italiane.
Si pasojë, aeroportet e Romës dhe Milanos kanë paralajmëruar pasagjerët për vonesa dhe anulime, duke u kërkuar të kontaktojnë kompanitë ajrore për informacion mbi fluturimet e tyre.
ENAV ka sqaruar se defekti nuk lidhet me ndonjë sulm kibernetik apo veprim të qëllimshëm. Problemi është lokalizuar në rrjetin e transmetimit të të dhënave dhe ekipet teknike po punojnë për rikthimin e funksionimit të plotë të sistemit.
Skyweb.al po mbledh të dhëna të tjera për të identifikuar fluturimet nga Shqipëria dhe drejt saj që janë prekur nga ky defekt. Do t’ju informojmë në vijim për anulimet, vonesat dhe zhvillimet e reja. /skyweb.al
