Shitja e pijeve energjike me përmbajtje të lartë kafeine për fëmijët nën moshën 16 vjeç do të ndalohet në Angli duke filluar nga prilli i vitit të ardhshëm, në një përpjekje për të ulur normat e obezitetit te fëmijët.
Sipas rregullave të reja, do të jetë e paligjshme të shiten pije që përmbajnë më shumë se 150 mg kafeinë për litër personave nën 16 vjeç, në të gjitha pikat e shitjes, përfshirë dyqanet online, dyqanet fizike, restorantet dhe kafenetë. Gjithashtu, edhe makinat automatike të shitjes (vending machines) do ta kenë të ndaluar ofrimin e këtyre pijeve, për të parandaluar që të miturit t’i blejnë duke anashkaluar kufizimet e reja.
Çaji, kafeja dhe pijet freskuese me përmbajtje më të ulët kafeine, si Coca-Cola dhe Pepsi, do të përjashtohen nga këto kufizime. Megjithatë, markat e njohura që e tejkalojnë kufirin e lejuar dhe që do të ndalohen për personat nën 16 vjeç përfshijnë Red Bull, Monster, Relentless dhe Prime.
Këto produkte tashmë mbajnë paralajmërime nga prodhuesit ku thuhet se nuk rekomandohen për fëmijët. Deri në një të tretën e fëmijëve në Mbretërinë e Bashkuar konsumojnë të paktën një pije energjike çdo javë, ndërsa djemtë rezultojnë konsumatorët më të shpeshtë.
Disa prej këtyre pijeve përmbajnë sasi kafeine të barabartë me dy filxhanë kafe ose katër kanaçe pijesh me gaz.
Pijet energjike kanë fituar popullaritet të madh mes të rinjve në vitet e fundit, ndërsa shitjet e pijes virale Prime janë rritur ndjeshëm pasi ajo u promovua nga YouTuber-ët KSI dhe Logan Paul.
Ministrja e Shëndetit Publik, Sharon Hodgson, tha: “Pijet energjike me përmbajtje të lartë kafeine nuk kanë vend në duart e fëmijëve.”
