Tirana vijon të dominojë kreditimin në Shqipëri, duke përqendruar pjesën dërrmuese të huave bankare të dhëna në vend.
Sipas të dhënave të Bankës së Shqipërisë, në tremujorin e parë të vitit 2026, kredia totale sipas qarqeve arriti në rreth 944.6 miliardë lekë.
Vetëm Tirana kishte rreth 715.9 miliardë lekë kredi, ose afërsisht 76% të totalit kombëtar. Në vendin e dytë renditet Durrësi, por me një diferencë shumë të madhe, me rreth 61.2 miliardë lekë kredi.
Të dhënat tregojnë se aktiviteti ekonomik dhe financiar mbetet shumë i përqendruar në kryeqytet, ndërsa qarqet e tjera mbajnë një peshë dukshëm më të ulët në kreditim.
Ky hendek lidhet me përqendrimin në Tiranë të bizneseve të mëdha, ndërtimit, tregtisë, shërbimeve dhe pjesës më të madhe të aktivitetit bankar.
Ndërkohë, kreditimi në të gjithë ekonominë po vijon të zgjerohet me ritme të forta. Në maj 2026, pretendimet e sistemit bankar ndaj sektorëve të ekonomisë arritën në rreth 985.4 miliardë lekë.
Krahasuar me të njëjtën periudhë të një viti më parë, kredia u rrit me rreth 11%.
Rritja tregon një zgjerim të ndjeshëm të huadhënies për individët dhe bizneset, të nxitur nga kërkesa për kredi për banesa, investime dhe aktivitet ekonomik. Megjithatë, shifrat konfirmojnë se pjesa më e madhe e këtij financimi vijon të kanalizohet në Tiranë, duke thelluar diferencën me pjesën tjetër të vendit. /skyweb.al
