Një sulm i rëndë kibernetik ka paralizuar Agjencinë Kombëtare të Kadastrës dhe Reklamimit të Pasurive të Paluajtshme të Rumanisë (ANCPI), pasi një haker fshiu bazën e të dhënave të regjistrit të pronave, pas dështimit të përpjekjes së tij për të zhvatur para nga autoritetet.
Para sulmit, autori publikoi një mesazh kërcënues në një forum të njohur të hakerëve, duke paralajmëruar se Rumaninë e prisnin pasoja të rënda. Ai pretendoi se kishte siguruar akses në të dhënat personale të qytetarëve rumunë, si edhe në serverët GitLab të institucionit, ku ruheshin kodet burimore të sistemeve kryesore, përfshirë Eterra dhe RENNS. Sipas tij, në serverë ishte ngarkuar edhe një version i programit ransomware që kishte zhvilluar.
Fillimisht, ANCPI e përshkroi ndërprerjen e shërbimeve si pasojë e “problemeve teknike”. Megjithatë, më vonë autoritetet pranuan se institucioni ishte goditur nga një sulm kibernetik, i cili ka nxjerrë jashtë funksionit sistemet e tij.
Sipas raportimeve, hakeri kishte hyrë në rrjet duke përdorur kredenciale të vlefshme. Pasi tentativa për zhvatje dështoi, ai fshiu të gjitha të dhënat e marra, përfshirë dokumente të brendshme, kredenciale të punonjësve dhe bazën e të dhënave të regjistrit të pronave.
Pasojat e sulmit janë të konsiderueshme. Tregu i pasurive të paluajtshme në Rumani është bllokuar pothuajse tërësisht, pasi noterët nuk mund të regjistrojnë transaksione të reja, ndërsa qytetarët nuk kanë mundësi të pajisen me dokumente pronësie apo informacione zyrtare mbi pronat e tyre. Çdo vit, në Rumani realizohen mesatarisht nga 150 mijë deri në 170 mijë transaksione për njësi banimi.
Hakeri, i njohur në dark web me pseudonimin “ByteToBreach”, dyshohet se ka qenë i përfshirë më herët edhe në një sulm ndaj portalit suedez të qeverisjes elektronike. Sipas raportimeve, identiteti i tij është zbuluar dhe të dhënat personale janë bërë publike.
Ndërkohë, noterja rumune Ana Stan përshkroi situatën e krijuar, duke deklaruar se prej disa ditësh nuk mund të lëshojë ekstrakte nga regjistri i pronave, të vërtetojë kontrata shitblerjeje apo të regjistrojë hipoteka, duke paralizuar punën e zyrave noteriale.
Në një tjetër postim në dark web, hakeri pretendoi se kishte nisur të fshinte edhe kopjet rezervë të të dhënave të vjedhura, në përpjekje për të penguar rikuperimin e tyre.
Megjithatë, autoritetet rumune kanë arritur të rikthejnë në funksion faqen zyrtare të ANCPI-së dhe kanë njoftuar se po rindërtojnë nga e para infrastrukturën e rrjetit të agjencisë. Sipas informacioneve paraprake, institucioni disponon një kopje rezervë jashtë rrjetit kryesor, e cila mund të mundësojë rikthimin e të dhënave të humbura./skyweb.al
